Халқ депутатлари Бухоро туман Кенгашининг навбатдаги сессияси бўлиб ўтди. Унда “Работ Қалмоқ” кичик саноат ишлаб чиқариш зонасини ташкил этиш бўйича Бухоро туман ҳокими ўринбосари З.Тоҳировнинг ҳисоботи эшитилди ҳамда ишчи гуруҳининг хулосалари муҳокама килиниб, депутатларнинг таклифлари асосида тегишли қарорлар қабул қилинди. Унга кўра, Бухоро тумани ҳудудида янги иккита кичик саноат зонаси ташкил этиладиган бўлди.

– Халқ депутатлари туман Кенгаши қарори билан ўтган йил “Работ Қалмоқ” кичик саноат зонасини ташкил этиш бўйича ишчи гуруҳ тузилган эди, – дейди O‘zLiDeP депутатлик гуруҳи раҳбари Ўлмас Раҳматов. – Аммо орадан шунча вақт ўтган бўлса-да, таклиф этилаётган кичик саноат зонаси ҳудудида бугунги кунда фаолият юритиб келаётган 15 та тадбиркорлик субъекти учун электр энергияси, газ ва сув таъминотини яхшилаш бўйича деярли ҳеч қандай амалий иш қилингани йўқ. Ваҳоланки, “Работ Қалмоқ”да инновацион тадбиркорликни ривожлантириш бўйича барча имкониятлар етарли. Ишчи гуруҳнинг ишга панжа орасидан қараши оқибатида 3 та корхона ўз фаолиятини бошқа жойда давом эттирмоқда.

Таъкидлаш керак, “Работ Қалмоқ”да электор энергияси, сув ва газ тармоқларидаги узилишлар тадбиркорларни бу ҳудуддан узоқлаштиряпти. Шу боис кичик саноат зонасини ривожлантириш учун тумандаги барча мутасадди идораларга топшириқ берилди. Халқ депутатларининг ўтган йил 23 майдаги қарори ижросини таъминлашда сусткашликка йўл қўйгани учун Бухоро туман ҳокими ўринбосари Зокир Тоҳировга огоҳлантириш берилди.

Ҳасан САЛОМОВ,

O‘zLiDeP матбуот хизмати

O‘zLiDePнинг Facebook ва Instagram’даги расмий саҳифаси ҳамда Telegram’даги каналига аъзо бўлиб, сўнгги янгиликлардан хабардор бўлинг!