Жорий йилнинг 25 апрель куни O‘zLiDeP Сиёсий Кенгаши Ижроия қўмитасида “Якка тартибдаги тадбиркорлик фаолиятининг бугунги ҳолати, ушбу фаолиятни ривожлантириш истиқболлари”ни ўрганиш якунларига бағишланган амалий мулоқот бўлиб ўтди.

Мулоқотда O‘zLiDeP фракцияси ва маҳаллий Кенгашлардаги партия депутатлик гуруҳи аъзолари, Олий суд, Адлия вазирлиги, Солиқ ва статистика қўмиталари, Савдо-саноат палатаси ходимлари, Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя килиш бўйича вакил, тадбиркорлар ва журналистлар иштирок этди.

Таъкидлаш керак, O‘zLiDeP Сиёсий Кенгаши Ижроия Қўмитаси ташаббуси билан жорий йилнинг февраль-апрель ойларида 170 туман ва 30 та шаҳардан якка тартибдаги тадбиркорлик субъектлари фаолияти ўрганилган эди. Ўрганиш жараёнида ЯТТга оид амалдаги қонун ҳужжатларини такомиллаштиришга доир 15 тадан ортиқ масала муҳокама этилди. Жумладан, маҳаллий ҳокимликлар томонидан якка тартибдаги тадбиркорлик фаолиятини ривожлантириш юзасидан кўрилаётган чора-тадбирлар, ҳудудларда фаолият юритаётган якка тартибдаги тадбиркорлар сонини аниқлашга ва ишламаётган ёки маълум сабабларга кўра фаолиятини тўхтатган тадбиркорлар муаммоларини ўрганишга алоҳида эътибор қаратилди. Шунингдек, якка тартибдаги тадбиркорларни руйхатга олиш уларнинг солиқ ва бошқа  мажбурий тўловлар юзасидан тўлов қобилиятини ошириш, ЯТТларга кредит ажратишда халқаро тажрибага асосан таъминотнинг муқобил шаклларини қўллаш юзасидан таклифлар ишлаб чиқилди. Ўрганилган масалалар юзасидан 600 га яқин депутатлик сўрови юборилди.

Депутатлик сўровлари бўйича олинган жавоб хатлари, тадбиркорлар таклиф-мулоҳазалари, соҳага оид халқаро тажрибага асосан O‘zLiDeP ишчи гуруҳи қуйидаги таклифларни илгари суради.

Биринчидан, ЯТТлар фаолияти билан боғлиқ ҳуқуқий муносабатлар Фуқаролик кодекси, “Тадбиркорлик фаолияти эркинлигининг кафолатлари тўғрисида”ги Ўзбекистон Республикаси Қонуни, Президентнинг фармон ва қарорлари каби 40 дан зиёд норматив-ҳуқуқий ҳужжатларлардаги тарқоқ нормалар асосида тартибга солинади. Партия ана шу тарқоқ нормаларни бир қонун доирасига бирлашлаштириш тарафдори.

Иккинчидан, судларда якка тадбиркорлар ҳуқуқ ва манфатлари ҳимоясини таъминланишини қониқарли деб баҳолаб бўлмайди. Шунингдек, ЯТТга солинадиган солиқлар, бошқа мажбурий тўлов ва тарифлар бўйича халқаро тажриба чуқур ўрганилмаган. O‘zLiDeP мутахассислар ва экспертлар иштирокида халқаро тажрибани ўрганиб, миллий қонунчилик тизимига сингдиришни энг муҳим сифатида баҳолайди.    

Шундан келиб чиқиб, тадбирда якка тартибдаги тадбиркорлик субъектлари ҳуқуқлари ва манфаатларини ифода этиш ҳамда уларнинг фаолиятига кўмаклашиш, улар фаолиятини мувофиқлаштириб бориш ва ҳимоя қилиш мақсадида “Якка тадбиркорлар уюшмаси”ни тузиш таклифи қўллаб-қувватланди.

Тадбирда ҳунармандлик фаолиятини ривожлантириш, ҳунармандлик субъектларига тўғридан-тўғри валюта тушумларини ошириш, ҳунармадлик зоналарини ташкил этиш тўғрисидаги таклиф ҳам муҳокама этилди.

Қизғин муҳокамаларга бой бўлган мулоқот якунида иштирокчилар O‘zLiDePнинг “Якка тартибдаги тадбиркорлик тўғрисида”ги қонуни лойиҳаси,  “Якка тартибдаги тадбиркорлик фаолияти самарадорлигини тубдан яхшилаш чора-тадбирлари тўғрисида”ги Президенти қарори лойиҳасида илгари сурилган таклифлар қўллаб-қувватланди. Шунингдек, депутатлари билан ҳамкорликда “Якка тартибдаги тадбиркорликни ривожлантириш Дастури Йўл харита”сини ишлаб чиқиш ва тегишли Кенгашлар сессиялари кун тартибига киритишга келишиб олинди.

Амалий мулоқот якунида якка тартибдаги тадбиркорлар билан юзма-юз мулоқотларни тизимли равишда ўтказиш ва бу йўналишда энг чекка ҳудудларда фаолият кўрсатаётган тадбиркорлик субъектларини жалб этишга келишиб олинди.

O‘zLiDeP матбуот хизмати

O‘zLiDePнинг Facebook ва Instagram’даги расмий саҳифаси ҳамда Telegram’даги каналига аъзо бўлиб, сўнгги янгиликлардан хабардор бўлинг!