O‘zLiDeP Сиёсий Кенгаши Ижроия қўмитаси ҳамда партиянинг Навоий вилоят Кенгаши масъул ходимлари аҳоли, айниқса, партия электорати бўлган тадбиркор ва ишбилармонлар билан яқиндан мулоқот қилиш, уларни ўйлантириб келаётган муаммоларга ечим топиш мақсадида вилоятда фаолият юритаётган тадбиркорлар билан учрашди.

Партия фаоллари дастлаб Қизилтепа туманидаги “Toshrabot textile” масъулияти чекланган жамияти фаолияти билан танишди.

Мазкур корхона Туркия, Хитой ва Тайван давлатларидан келтирилган 300 та замонавий тикув машинаси ва 30 та тўқув дастгоҳи билан жиҳозланган. Технологик жиҳозлар учун қарийб 10 миллиард сўмлик маблағ йўналтирилди.

Шу ернинг ўзида корхона раҳбари Улуғбек Файзиев партия фаолларига корхонада яратилган шарт-шароитлар, кластер ва конвейр усулининг афзалликлари ҳақида сўзлаб берди.

–Корхонамиз йилига 6-6,5 миллион АҚШ доллар қийматидаги 6 миллион дона тайёр маҳсулот ишлаб чиқариш қувватига эга, – дейди корхона раҳбари У.Файзиев. – Айни чоғда 500 нафар ишчи-ходим меҳнат қилаётган корхонада ишлаб чиқарилаётган маҳсулотларнинг қарийб 50 фоизи хорижга экспорт қилинади. Шу кунларда корхона фаолиятини янада кенгайтириб,  ёшлар учун янги иш ўринлари яратиш ҳаракатидамиз. Агар корхонанинг навбатдаги босқичи ишга тушса ёшлар учун яна 500 та иш ўрни яратилади.

Ўрганишлар давомида партия ходимлари корхона фаолиятини янада ривожлантириш, экспортбоп маҳсулотларни ишлаб чиқариш, шунингдек, мамлакатимизда тадбиркорлар учун яратилаётган шарт-шароитлар, қулайликлар, солиқ, божхона тизимидаги ўзгаришлар ҳақида тушунчалар берди.

Шунингдек, партия фаоллари тумандаги чорвачиликка ихтисолашган “21 аср” фермер хўжалигида йирик шохли наслдор моллар етиштириш борасида амалга оширилаётган ишлар билан танишди.

Шуни алоҳида таъкидлаш керакки, партия фаолларининг ташрифи давомида ҳеч бир соҳа ёки йўналиш эътибордан четда қолмади. Масалан, “Маликобод” қишлоғида яшовчи Зиёдулла Азизов ва Иззат Ахматовларга боғдорчилик, узумчилик ва асаларичиликни ривожлантириш, соҳага илмий ва замонавий технологияларни жалб этиш борасида зарур кўрсатмалар, тавсиялар берилди.

O‘zLiDeP Навоий вилоят Кенгаши

матбуот хизмати

O‘zLiDePнинг Facebook ва Instagram’даги расмий саҳифаси ҳамда Telegram’даги каналига аъзо бўлиб, сўнгги янгиликлардан хабардор бўлинг!