O‘zLiDeP хотин-қизларнинг ижтимоий шароитини яхшилаш, жамиятдаги мавқеини ошириш, аёлларни тадбиркорликка кенг жалб этиш мақсадида кўплаб лойиҳаларни ҳаётга татбиқ этган. Жумладан, “Соғлом оила – мустаҳкам оила”, “Бунёдкор аёллар”, “Ишбилармон аёл” лойиҳалари фикримизга яққол далилдир. Мазкур лойиҳалар хотин-қизларни ишга жойлаштириш, уларни ижтимоий муҳофаза қилиш ва қизларни оилага тайёрлашга хизмат қилаётир. 

Эндиликда партия хотин-қизларнинг ҳуқуқлари ва қонуний манфаатларини ҳимоя қилиш, муаммоларини ўз вақтида аниқлаш, улар  ўртасида ҳуқуқбузарликларни олдини олиш, жазони ижро этиш муассасаларидан озод қилинган хотин-қизларнинг ижтимоий реабилитацияси ва мослашиши бўйича чора-тадбирларни амалга ошириш, уларни тадбиркорликка ва ҳунармандчиликка кенг жалб этишга мўлжалланган янги лойиҳани амалга ошириш остонасида турибди. Бу ҳақида “15 май – Халқаро оила куни” муносабати билан ўтказилган тадбирда маълум қилинди.  

Янги лойиҳа тақдимотида O‘zLiDeP Сиёсий Кенгаши Ижроия қўмитаси ходимлари, партия фракцияси аъзолари, партия Тошкент шаҳар Кенгаши фаоллари, Ўзбекистон Хотин-қизлар қўмитаси, “Оила” илмий-амалий маркази, ЎзННТМА, “Маҳалла” хайрия жамоат фонди вакиллари ва журналистлар иштирок этди.

“Аёллар қаноти”нинг янги – “Фаровон оила” лойиҳаси Президентимизнинг “Хотин-қизларни қўллаб-қувватлаш ва оила институтини мустаҳкамлаш соҳасидаги фаолиятни тубдан такомиллаштириш чора-тадбирлари тўғрисида”ги Фармони ижросини таъминлаш, шунингдек, жамиятда хотин-қизларнинг ижтимоий-сиёсий фаоллигини ошириш, оила институтини мустаҳкамлашда давлат ва нодавлат ташкилотларининг ҳамкорлигини янада кучайтириш мақсадида ишлаб чиқилди.

Лойиҳа доирасида хотин-қизларни қўллаб-қувватлашга доир давлат сиёсатининг самарали амалга оширилишини таъминлаш, уларнинг ҳуқуқлари ва қонуний манфаатларини ҳимоя қилиш, хотин-қизлар муаммоларини ўз вақтида аниқлашга алоҳида эътибор қаратилган. Ёрдамга муҳтож ва оғир ижтимоий аҳволга тушиб қолган ҳамда имконияти чекланган аёлларнинг манзилли рўйхатларини тузиш, уларга ижтимоий-ҳуқуқий, психологик ва моддий ёрдам кўрсатиш каби вазифаларни амалга ошириш режалаштирилган. Шунингдек, хотин-қизлар ўртасида ҳуқуқбузарликларни олдини олиш, ҳуқуқбузарликка мойиллиги бўлганлар билан якка тартибда ишлаш, жазони ижро этиш муассасаларидан озод қилинган хотин-қизларнинг ижтимоий реабилитацияси ва мослашиши бўйича давлат ва нодавлат органлари билан яқин ҳамкорликни таъминлашга алоҳида эътибор қаратилган.  

Лойиҳа доирасида ҳамкор ташкилотлар – Ўзбекистон Хотин-қизлар қўмитаси, “Оила” илмий-амалий маркази, Ўзбекистон нодавлат нотижорат ташкилотлари миллий ассоциацияси, “Маҳалла” хайрия жамоат фонди билан ҳамкорликда миллий оилавий қадриятларни мустаҳкамлаш бўйича мақсадли ишлар олиб борилади. Жумладан, эрта никоҳ ва оилавий ажримларни олдини олиш ҳамда хотин-қизлар ўртасида ҳуқуқбузарлик, жиноятчилик ва суицидлар профилактикасига, уларнинг ҳуқуқий маданиятини оширишга ва маънавий-ахлоқий қадриятларни мустаҳкамлашга қаратилган тадбирларни ташкил этиш бўйича аниқ чора-тадбирлар дастури белгилаб олинган. Бундан ташқари, аёлларнинг сиёсий-ҳуқуқий, маънавий-маърифий, диний, ижтимоий-иқтисодий эҳтиёжларини ўрганиб, уларнинг манфаатларини ҳар томонлама ҳимоя қилиш юзасидан таклифлар бериш, нотинч ва муаммоли оилаларни ўз вақтида аниқлаш, улардаги ижтимоий-маънавий муҳитни соғломлаштириш, низоли ҳолатларнинг олдини олиш ва оилавий муносабатларни яхшилаш каби вазифалар O‘zLiDeP янги лойиҳасининг устувор вазифасидир.

Лойиҳа тақдимотига бағишланган тадбирда Президентимизнинг “Хотин-қизларни қўллаб-қувватлаш ва оила институтини мустаҳкамлаш соҳасидаги фаолиятни тубдан такомиллаштириш чора-тадбирлари тўғрисида”ги фармонидан келиб чиқиб, “Фаравон оила” лойиҳасини янада такомиллаштириш бўйича таклиф-тавсиялар берилди.

O‘zLiDeP матбуот хизмати

O‘zLiDePнинг Facebook ва Instagram’даги расмий саҳифаси ҳамда Telegram’даги каналига аъзо бўлиб, сўнгги янгиликлардан хабардор бўлинг!