Булоқбоши туманидаги “Боймаҳалла” МФЙда яшовчи аҳоли болалари кўпдан бери бўш вақтини унумли ўтказолмай халак. Тўғри, айрим ота-оналар имкониятидан келиб чиқиб, фарзандларини бошқа ҳудуддаги касб-ҳунарга йўналтирилган тўгаракларга жалб қилган. Бироқ қолганларичи?...

O‘zLiDeP Булоқбоши туман кенгаши томонидан ҳудудда ташкил этилган сайёр қабулда ҳудуд аҳолисининг мазкур муаммо юзасидан қилган мурожаати шу ернинг ўзида ижобий ҳал этилди.  

Айни чоғда маҳалла ёшлари ҳудуддаги 14-сон Болалар мусиқа ва санъат мактаби директори, халқ депутатлари Булоқбоши туман кенгаши депутати Олимжон Матғозиев ташаббуси билан ушбу муассасада ташкил этилган турли тўгаракларга қатнамоқда.

Сайёр қабул давомида шунингдек, ҳудуд аҳлининг янги қабристон учун ер ажратишда амалий ёрдам сўраб қилган мурожаати ҳам мутасаддилар эътиборидан четда қолмади. Туман ободонлаштириш бўлими масъул ходими мазкур масала ечими “Обод қишлоқ” дастурига киритилганлигини маълум қилди.

–Сайёр қабулда кам таъминланган оилаларга берилиши кўзда тутилган уй-жойлардан ажратилишида кўмак беришларини сўраб мурожаат қилган эдим, – дейди “Олтин мерос” кўчасида яшовчи Рустам Эрматов. – Зарур ҳужжатларни шу жойнинг ўзида кўриб чиққан туман ҳокимлиги мутасаддиси 2 сотихдан иборат намунали уйлар соҳиблари рўйхатига киритишини маълум қилгани мени жуда ҳурсанд қилди. Бугунги учрашувни ташкил қилган партия фаоллари ва мутасаддиларга раҳмат!

Хуллас, сайёр қабул давомида фуқаролар томонидан келиб тушган мурожаатларнинг аксарияти шу ернинг ўзида ҳал этилди, ечими вақт талаб қиладиган масалалар назоратга олинди.

Олимжон ТАЛИПОВ,

O‘zLiDeP Андижон вилоят Кенгаши

бўлим мудири

O‘zLiDePнинг Facebook ва Instagram’даги расмий саҳифаси ҳамда Telegram’даги каналига аъзо бўлиб, сўнгги янгиликлардан хабардор бўлинг!