Халқ депутатлари Хоразм вилоят Кенгашидаги O’zLiDeP депутатлик гуруҳи ҳамда Халқ депутатлари вилоят Кенгаши Маҳаллий бюджетни шакллантириш ва ижро этиш, иқтисодий ислоҳотни амалга ошириш ва тадбиркорликни ривожлантириш масалалари бўйича доимий комиссиясининг қўшма йиғилиши бўлиб ўтди.

Йиғилишда Вазирлар Маҳкамасининг 2015 йил 7 октябрдаги “Тадбиркорлик фаолиятини амалга ошириш учун танлов асосида ер участкалари бериш тартиботларини ва қурилиш учун рухсатномалар олиш тартибини янада такомиллаштириш чора-тадбирлари тўғрисида”ги қарори ижроси юзасидан вилоят ер тузиш ва кўчмас мулк кадастри давлат корхонаси раҳбари Қ.Бекчановнинг ҳисоботи тингланди.

Ҳисоботда таъкидланганидек, бугун вилоятда давлат рўйхатидан ўтказилган ер участкалари сони жами 635 та бўлиб, шундан 2016 йилда 253 та ер участкаси 2,81 га, 2017 йилда 362 таси 4,58 га, 2018 йилда 20 та 0,69 га ер майдонлари вилоят ер тузиш ва кўчмас мулк кадастри давлат корхонасининг туман (шаҳар)лар филиаллари томонидан давлат рўйхатидан ўтказилган.

– Мазкур қарор ижроси бўйича Хоразм вилоятида 2017 йил давомида 201 та лойиҳа амалга оширилиши белгиланган эди, – дейди доимий комиссияси раиси Ш.Сафарбаев. – Ўрганишлар давомида барча туман (шаҳар)лар ҳудудида тадбиркорларга ажратилган ер майдонларида амалга оширилиши кўзда тутилган лойиҳаларнинг ўз вақтида тўлиқ ва сифатли амалга оширилмагани, лойиҳалар учун ажратилган ер майдонлари ҳеч қандай мақсадсиз, ўз ҳолига ташлаб қўйилгани аниқланди. Жумладан, Урганч шаҳрида 29 та лойиҳадан бирортаси ҳам ишга туширилмаган. Хива, Гурлан, Боғот туманларида ҳам ишлар қониқарсиз аҳволда.

Йиғилишда шунингдек, кун тартибидаги масалалар юзасидан вилоят ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари Ш.Абдуллаев, Хоразм вилоят “Кўчмас мулк савдо хизмати” МЧЖ директори Б.Саиджанов, вилоят архитектура ва қурилиш бош бошқармаси бошлиғи Ш.Атажановнинг ҳам ҳисоботлари эшитилди.

Йиғилишда назорат-таҳлил фаолияти давомида аниқланган муаммолар ва камчиликлар ҳамда уларнинг ечими бўйича таклифлар вилоят Кенгаши сессияси кун тартибига киритилиши белгиланди.

         Қувончбек ҲАМРОЕВ,

O‘zLiDeP Хоразм вилоят Кенгаши

депутатлик гуруҳлари билан ишлаш

бўлими мудири

O‘zLiDePнинг Facebook ва Instagram’даги расмий саҳифаси ҳамда Telegram’даги каналига аъзо бўлиб, сўнгги янгиликлардан хабардор бўлинг!