O‘zLiDeP Нуробод туман кенгаши томонидан “Ишбилармон аёл” кўрик-танловининг туман босқичи ўтказилди.

Унда тумандаги фермерлик, касаначилик, каштачилик, гилам тўқиш, тикувчилик билан шуғулланаётган 30 нафарга яқин тадбиркор ва ишбилармон аёллар ўз ижод намуналари ва ишлаб чиқарган маҳсулотлари билан қатнашди.

Нурободнинг Жом қишлоғида яшовчи Қундуз опа Худоёрова 20 йилдан буён гилам тўқиш билан шуғулланади. У момоларидан ўрганган касб сирларини бугун қизларига ва набираларига ўргатмоқда.

–Гилам тўқиш бизнинг оилавий анъанамизга киради. Гиламларимиз табиийлиги билан ажралиб туради, – дейди Қундуз опа. – Бунда ипакни  ўсимликлардан  ёнғоқ, анор, пиёз пўстлоғини  қайнатиб олинган ранглар билан бўяймиз. Шунингдек, туя жунидан тўқилган гиламларимиз ҳам харидоргир. Чунки, у инсон саломатлиги учун яъни, оёқ ва бел оғриғида яхши фойда беради. Шу боисдан маҳсулотларимизга хорижлик меҳмонларнинг қизиқиши катта.

Шаҳзода Ҳудоёрова тукувчиликнинг қуроқчилик тури, яъни қолдиқ матоларни бир-бирига улаб, бежирим либослар яратиш билан шуғулланади. У томонидан танловга тақдим этилган ижод намуналари йиғилганларда катта таъсурот қолдирди.

– Мамлакатимизда ёшларга катта эътибор қаратилмоқда. Шу боис тижорат банкидан имтиёзли кредит олиб, фаолиятимни яна кенгайтирмоқчиман, – дейди Шаҳзода.

Танловда ғолиб ва совриндорлар партия туман кенгаши томонидан димлом ва эсдалик совғалари билан тақдирланди.

Бахтигул ҚАРШИЕВА,

O’zLiDeP Самарқанд вилоят

Кенгаши матбуот котиби

O‘zLiDePнинг Facebook ва Instagram’даги расмий саҳифаси ҳамда Telegram’даги каналига аъзо бўлиб, сўнгги янгиликлардан хабардор бўлинг!