Олий Мажлис Сенати аъзоси Солижон Мўминов ва Қонунчилик палатаси депутати Наргиз Халилова халқ билан мулоқот қилиш, одамларнинг ичига кириш, уларнинг дарду ташвишларини ўрганиш, инсон манфаатларини таъминлаш мақсадида Норин туманидаги “Ровот”, “Полвонкўл”, “Хўжаобод”, “С.Рахимов”, “Бойовул”, “Норинкапа” ва “Сойбўйи” маҳаллалари аҳолиси билан учрашди.

Юзма-юз мулоқотлар давомида фуқаролар томонидан 20дан ортиқ муаммо ва таклифлар билдирилди. Хусусан, кўчаларни шағаллаштириш, суюлтирилган газ, тоза ичимлик суви, электр таъминотини янада яхшилаш, аёлларни иш билан таъминлаш, кредит масаласи ҳамда МТМ қуриш бўйича кўплаб мурожаатлар ўртага ташланди.

–Маҳаллага кўчиб келганимизга 25 йил бўлди, – дейди “Ровот” МФЙда истиқомат қилаётган Сайдулло Адашев. – Шу вақтга қадар бирор маротаба кўчамизга эътибор берилмаган. Йўлларимиз жуда ҳам таъмирталаб аҳволга келиб қолган. Қиш мавсумида болаларимиз мактабга бориб-келишга қийналади. Шу масалада халқнинг ишончли вакили Солижон Мўминовга мурожаат қилган эдик, мана, уларнинг ташаббуси билан кўчамизнинг 1 кмга яқин йўлларига шағал ётқизилди.

Таъкидлаш керак, учрашувлар давомида Қонунчилик палатаси депутати Наргиз Халилова шу ҳудудда яшовчи Насиба Аҳмедова ва Урайимжон Сотволдиевларга ногиронлик аравачаси ҳамда 25 дан ортиқ хонадонларга  суюлтириган газ баллонлари ажратилишига кўмаклашди.

Рустамжон ХАКИМОВ,

O‘zLiDeP Наманган вилоят Кенгаши

бўлим мудири

O‘zLiDePнинг Facebook ва Instagram’даги расмий саҳифаси ҳамда Telegram’даги каналига аъзо бўлиб, сўнгги янгиликлардан хабардор бўлинг!