O‘zLiDeP Хоразм вилоят Кенгаши томонидан “Уз-Донг Янг Ко” Узбекистон-Корея қўшма корхонаси Питнак филиалида амалий мулоқот ташкил этилди.

Тадбир давомида корхона бош директори Азамат Ғафуров иштирокчиларни корхона фаолияти ва ишлаб чиқариш жараёнлари билан яқиндан таништирди. Корхонада яратилган шароитлар, юқори даражада ўрнатилган тартиб-интизом, ишчи-ходимларнинг жўшқин кайфияти йиғилганларга катта таасурот қолдирди.

– Корхонамизда “Дамас” автомобиллари учун ички интерер бутловчи қисмлар ишлаб чиқарилади, – дейди Ш. Ҳабибуллаев.– Йилига 40 минг дона автомобил бутловчи қисмларини “GM Uzbekiston” AЖ Хоразм филиалига етказиб беряпмиз. Айни чоғда корхонамизда 121 нафар ишчи-ходим меҳнат қилмоқда. Жорий йил апрель ойида ишчи-хизматчилар учун махсус кийим-бош ва халқ истеъмоли моллари ишлаб чиқаришга ихтисослаштирилган янги тикувчилик цехини ишга тушиши натижасида яна 10 нафар хотин-қиз иш билан таъминланди.   

– Корхонамизда ишчи-ходимлар учун барча шароитлар яратилган, – дейди меҳнатни муҳофаза қилиш муҳандиси Шавкат Матназаров. – Ходимларимиз ҳар йили режа асосида Андижон вилоятидаги бош корхонамизга бориб малака ошириб келади. Қолаверса, меҳнат таътили давомида сиҳатгоҳларга юборилиб, моддий ва маънавий рағбатлантирилади. Бу эса, ўз навбатида, маҳсулотларимизни сифат ва миқдор жиҳатдан ўсишига, ходимларни ўз ишига нисбатан қизиқишини ошишига хизмат қилади.

Таъкидлаш керак, жорий йилнинг сентябрь ойига қадар корхона фаолиятини янада ривожлантириш, аҳолини янги иш ўринлари билан таъминлаш, ёшларни фойдали меҳнатга кўпроқ жалб қилиш мақсадида корхонада болалар оёқ кийимлари ишлаб чиқаришни йўлга қўйиш режалаштирилган.  

Юсупов ЮСУПБОЙ,

O‘zLiDeP Хазорасп туман

Кенгаши раиси

O‘zLiDePнинг Facebook ва Instagram’даги расмий саҳифаси ҳамда Telegram’даги каналига аъзо бўлиб, сўнгги янгиликлардан хабардор бўлинг!