Президентимиз ўтган йили Хоразм вилоятига ташрифи чоғида озиқ-овқат, қишлоқ хўжалиги маҳсулотлари жумладан, балиқ етиштириш ва уни қайта ишлашни йўлга қўйиш борасида ўз тавсияларини берган эди. Шундан кўп ўтмай, вьетнамлик мутахассислар билан ҳамкорликда Хива туман Чинобод  қишлоғидаги 400 гектарлик “Эшонработ” табиий сув ҳавзаси негизида интенсив усулда балиқ етиштириш ва уни қайта ишлаш ишлари бошлаб юборилди.

Вьетнамдан тажрибали мутахассислар таклиф этилиб, 10 гектар репродуктор сунъий ҳавзалар барпо қилинди. Интенсив усулда бу тарзда балиқ етиштириш маҳсулот етказиб бериш ҳажмини одатдагидан ўн ҳисса ошириш имконини яратади.

Шу тариқа “Хоразм балиқ саноат агро” МЧЖ ташкил этилиб, Ипотека банк ҳамкорлигида умумий лойиҳа қиймати 10,8 млрд. сўмни ташкил этувчи балиқ етиштириш ва уни қайта ишлаш мажмуаси, унинг таркибида маҳсус омухта ем цехи ва консерва заводи барпо этилди. У йилига 500 тонна балиқ маҳсулотларини қайта ишлаб консерва ва балиқ сосискалари ишлаб чиқариш қувватига эга.

Яқинда халқимизни ва хорижлик буюртмачиларни озиқ-овқат маҳсулотлари билан таъминлашда муҳим аҳамиятга эга ана шу корхона тантанали тарзда фойдаланишга топширилди. Шу муносабат билан бу ерга вилоят раҳбарлари, балиқчилик билан шуғулланувчи фермер хўжаликлари мутасаддилари, кенг жамоатчилик вакиллари ташриф буюрди.

– Хорижлик ҳамкорлар билан тажриба алмашиш жараёнида бир нарсани аниқ билиб олдик. Балиқчиликда юқори самарадорлик, энг аввало, унинг озуқа таркиби ва сифатига боғлиқ экан, – дейди О.Оллаберганов. –Янги ишга тушган соатига 6 тонна маҳсулот ишлаб чиқариш қувватига эга цехимиз орқали балиқчиликка ихтисослашган бошқа хўжаликларни ҳам озуқа билан таъминлаш имконига эгамиз. Энг муҳими, ҳамқишлоқларимиздан 50 нафари доимий иш билан таъминланди.

Йиғилганлар консерва заводи ва омухта ем цехи иш жараёни билан яқиндан танишдилар. Шу жойнинг ўзида вилоятдаги балиқчиликка ихтисослашган фермер хўжаликлари раҳбарлари ҳамда мутахассислари, банк ва бошқа қишлоқ хўжалиги билан боғлиқ ташкилотлар мутасаддилари иштирокида йиғилиш ўтказилди. Вилоят ҳокими ўринбосари Ў.Машарипов раислигида бўлиб ўтган анжуманда балиқчилик ва  қишлоқ хўжалигининг бошқа соҳаларидаги долзарб вазифалар белгилаб олинди.

Отабек Исмоилов,

Халқ депуталари

Хива туман Кенгашидаги

O‘zLiDePдепутатлик

гуруҳи аъзоси  

O‘zLiDePнинг Facebook ва Instagram’даги расмий саҳифаси ҳамда Telegram’даги каналига аъзо бўлиб, сўнгги янгиликлардан хабардор бўлинг!