O‘zLiDeP Шовот туман Кенгаши “Аёллар қаноти” ташаббуси билан туман ҳокимлиги, “Оила маркази” туман бўлими, Шовот туман Хотин-қизлар қўмитаси ҳамкорлигида “Фаровон оила” лойиҳаси доирасида “Ибратли оила” мавзуида кўрик-танлов ташкил этилди.

Лойиҳа доирасида ташкил этилган мазкур танловда тумандаги 12 та оила ўз чиқишлари билан қатнашдилар. Иштирокчилар кўргазмали чиқиш, “Бу менинг оилам” мавзусида видеоролик тақдимоти, савол-жавоб, “Оила мустаҳкамлиги юрт тинчлиги” мавзусида саҳна кўриниши шартлари бўйича баҳоландилар.

– Оилалар қанча барқарор ва мустаҳкам бўлса, жамият шунча юксалиб бораверади, – дейди O‘zLiDeP Шовот туман Кенгаши раисининг аёллар масалалари бўйича ўринбосари Муҳаббат Яхшимуратова. – Кўрик-танловдан кўзланган асосий мақсад ҳам оилаларни янада мустаҳкамлаш, қўллаб-қувватлаш ва рағбатлантириш, бу борадаги илғор тажрибаларни оммалаштиришдан иборат.

“Ибратли оила” кўрик-танлови ғолибларини аниқлашда иштирокчиларнинг оила барқарорлигини таъминлаш борасидаги билимлари, ҳаётий тажрибалари ҳам ҳисобга олинди. Оила аъзоларининг бурч ва масъулияти, маънавияти, китобхонлик даражаси, халқимизнинг миллий урф одатларини қай даражада билишига алоҳида эътибор қаратилди.

Танлов якунида Янгийўл O‘zLiDeP аъзоси Гулнора Маҳкамова ғолибликни қўлга киритди. Ғолиб ва совриндорларга партия туман Кенгаши ва ҳамкор ташкилотларнинг қимматбаҳо совғалари топширилди.

         Мушарраф Раҳимова,

O‘zLiDeP Хоразм вилоят Кенгаши

бўлим мудири

O‘zLiDePнинг Facebook ва Instagram’даги расмий саҳифаси ҳамда Telegram’даги каналига аъзо бўлиб, сўнгги янгиликлардан хабардор бўлинг!