O‘zLiDeP томонидан эътиборингизга ҳавола этилаётган янги  - “O‘zLiDeP: фаолият ва таҳлил” дастурининг илк сонида партия фаоллари томонидан мамлакатимизда томорқачиликни ривожлантириш борасида амалга оширилаётган қатор лойиҳалар ва амалий ишларга батафсил тўхталиб ўтамиз.

ВИДЕО (YouTube):

Аҳоли ихтиёридаги томорқа экин майдонларидан фойдаланишнинг самарадорлигини ошириш, узоқ йиллар фойдаланилмаётган томорқа эгаларининг ерга нисбатан муносабатини тубдан ўзгартириш ва оилалар фаровонлигини ошириш мақсадида ўтган йили “O‘zLiDeP бошланғич ташкилотлари ўз томорқасида тадбиркорлигини бошлаганларга кўмакдош” лойиҳаси ишлаб чиқилди ва бу бўйича O‘zLiDeP Сиёсий Кенгаши Ижроия қўмитасининг махсус қарори қабул қилинди.

Лойиҳага мувофиқ ҳар бир бошланғич партия ташкилотига томорқасида хусусий ишини бошламоқчи бўлган ёки иш бошлаб, айрим муаммоларга дуч келаётган 5 нафардан оилалар бириктирилди. Айниқса, уюшмаган ёшларнинг томорқачиликка жалб этилишига алоҳида эътибор берилди. Ҳаттоки, оилаларга илк марта тадбиркорлик бошлаши учун банкдан имтиёзли кредитлар олишда ҳам ёрдам кўрсатилди.

Қишлоқ хўжалигини жадал ривожлантириш бўйича олиб борилаётган ислоҳотлар натижадорлиги бўйича шу йил 23 мартда ўтказилган видеоселектор йиғилишида Президентимиз томорқалардан самарали фойдаланиш масаласига ҳам алоҳида тўхталгани, “Томорқага экин экиш” ойлигини эълон қилгани фаолларимизга ушбу йўналишнинг ғоят долзарблигини яна бир карра эслатди. Таъкидлаш керакки, давлатимиз раҳбарининг фикрлари, кўрсатмалари лойиҳага янгича руҳ, янгича суръат ва куч бағишлади.

Йил бошидан бошланғич партия ташкилотлари 21273 та хонадонга ташриф уюштиришган. Борилган хонадонларнинг 10922 нафарига амалий ёрдам кўрсатилган. Шундан, 4385 нафар хонадон эгаларига уруғлик ёки кўчатлар ҳомийлик асосида олиб берилган, 2213 нафарининг ерига ишлов берилган. 1462 та хонадонга ўз томорқасида тадбиркорликларини бошлашлари учун имтиёзли 7 фоизлик кредитларни олиб берилишида ёрдам кўрсатилган.  Шунингдек, 2900 дан ортиқ хонадоннинг ижтимоий-иқтисодий муаммолари ўрганилган ҳамда уларнинг ечилишида ҳам ҳуқуқий ҳам амалий ёрдамлар кўрсатилган.

Оҳангарон тумани, Қорахитой қишлоғида истиқомат қилувчи Фахриддан Қаюмов ҳам партия кўмагидан баҳраманд бўлганлардан. У ўз томорқасида асаларичиликни йўлга қўйиш ниятида банкдан кредит олиш учун мурожаат қилган. Аммо номаълум сабабларга кўра унга кредит ажратиш ортга сурилавергач ўз маҳалласидаги O‘zLiDeP бошланғич партия ташкилотига мурожаат қилди. Фуқаронинг мурожаати инобатга олиниб 7 фоизлик кредит олишга кўмаклашилди.

Агар сиз ҳам томорқангизда ўз тадбиркорлигингизни бошламоқчи бўлсангиз, O‘zLiDePнинг туман кенгашлари ёки tbpt@uzlidep.uz электрон манзилига мурожаат қилинг.

O‘zLiDePнинг Facebook ва Instagram’даги расмий саҳифаси ҳамда Telegram’даги каналига аъзо бўлиб, сўнгги янгиликлардан хабардор бўлинг!