O‘zLiDeP Жомбой туман Кенгаши “Маҳалла” ҳайрия жамоат фонди туман бўлинмаси билан ҳамкорликда  “Тадбиркор оила – фаровон оила” мавзуида давра суҳбати ўтказди.

Тадбирда Президентимизнинг 2018 йил 7 июндаги “Ҳар бир оила – тадбиркор” дастурини амалга ошириш тўғрисида”ги Қарорининг мазмун-моҳияти ва унда белгиланган устувор вазифалар ҳақида атрофлича сўз юритилди.

–Мазкур қарор мамлакатимизнинг ҳар бир гўшасида, энг аввало, олис ва иқлим шароити оғир ҳудудларда истиқомат қилаётган аҳолининг моддий шароитини яхшилаш, турмуш сифати ва даражасини ошириш мақсадида ишлаб чиқилган, – дейди O‘zLiDeP Жомбой туман Кенгаши аппарат раҳбари З.Юсупова. – Чунки дастурда аҳолига тижорат банклари томонидан имтиёзли кредит тақдим этиш бўйича аниқ ва содда меъёрлар белгиланган. Оилавий тадбиркорликни ривожлантириш мақсадида олинаётган имтиёзли кредитни расмийлаштиришда ортиқча қоғозбозлик ва югур-югурлар талаб этилмайди.                 

Тадбирда шунингдек, Қарорга мувофиқ, энг кам иш ҳақининг юз эллик бараваригача миқдорда бўлган кредит маблағлари оилавий ҳудудларни ижтимоий-иқтисодий ривожлантириш бўйича секторлар раҳбарлари ва маҳалла фуқаролар йиғини тавсияномалари асосида берилиши кўзда тутилгани алоҳида таъкидланди.

–Болаликдан тадбиркорлик фаолиятига жуда қизиқаман, – дейди Жомбой туман енгил-саноат касб-ҳунар коллежи ўқувчиси Салимжон Фармонов. – Шу боис, ўқишдан бўш вақтларимда ўз ҳовлимизда қорамол боқаман. Давлатимиз раҳбарининг мазкур қарори тадбиркорликни бошламоқчи бўлган, сармояси йўқ ёшлар учун катта имконият эшигини очади.

Тадбирда мазкур қарорни ҳар бир маҳаллада содда ва аниқ мисоллар асосида аҳоли ўртасида кенгроқ тарғиб қилиш юзасидан вазифалар белгилаб олинди.

Бахтигул ҚАРШИЕВА,

O‘zLiDeP Самарқанд вилоят

Кенгаши матбуот котиби

O‘zLiDePнинг Facebook ва Instagram’даги расмий саҳифаси ҳамда Telegram’даги каналига аъзо бўлиб, сўнгги янгиликлардан хабардор бўлинг!