Сўнгги йилларда мамлакатимизда қабул қилинаёган кўплаб Фармон ва Қарорларда тадбиркор ва мулк эгалари манфаати кўзланаётганини алоҳида эътироф этиш жоиз. Боиси, мазкур меъёрий ҳужжатларда тадбиркорларга қатор енгиллик берилиб, ортиқча овворагарчиликларга чек қўйилмоқда, солиқ ставкалари пасайиб, соҳада имтиёз ва переференциялар берилмоқда. 

Биргина мисол. Жорий йил  “Фаол тадбиркорлик, инновацион ғоялар ва технологияларни қўллаб-қувватлаш йили” муносабати билан тадбиркорлик субъектларининг молиявий-хўжалик фаолиятини текшириш бўйича икки йил муддатга мораторий эълон қилинди. Солиқ сиёсатини такомиллаштириш ва оптималлаштириш, солиқ юкини камайтириш, солиқ маъмурчилигини соддалаштириш бўйича ишлар давом эттирилмоқда.

Давлатимиз раҳбарининг жорий йил 26 июндаги “Давлат солиқ хизмати органлари фаолиятини тубдан такомиллаштириш чора-тадбирлари тўғрисида”ги қарори ҳам солиқ маъмуриятчилигини такомиллаштиришда муҳим қадам бўлди.

Ҳужжатга кўра, Давлат солиқ қўмитасининг “Республика ахборот-маслаҳат маркази” ва “Солиқ декларацияларини қайта ишлаш маркази” давлат унитар корхоналари негизида “Солиқ-сервис” давлат унитар корхонаси ташкил этилди. Давлат солиқ хизмати органлари солиқ тўловчиларнинг бизнес-ҳамкори ва маслаҳатчиси сифатидаги янги имиджини яратиш орқали хизмат кўрсатишга йўналтирилган идорага айлантириш, ҳар бир ходим томонидан “Солиқ хизмати – инсофли солиқ тўловчиларнинг ишончли ҳамкори” деган мақсадли вазифани амалга ошириш назарда тутилмоқда.

Бундан ташқари, 2019 йил 1 январдан давлат солиқ хизмати органлари хизмат кўрсатиш, савдо ва умумий овқатланиш соҳасидаги тадбиркорлик субъектлари учун ягона солиқ тўловини, ягона ер солиғини, юридик шахслардан ер солиғини, шунингдек, банк айланмалари ҳақидаги маълумотлар, шунингдек, бошқа ташқи манбалар асосида декларация қилинадиган даромадлар бўйича жисмоний шахслардан олинадиган даромад солиғини ҳисоблаш тарзида солиқ тўловчиларга сервис хизматлари кўрсатади ҳамда ҳисобланган солиқлар суммаси ҳақида солиқ тўловчининг “шахсий кабинети” орқали хабарнома юбориш белгилаб қўйилди.

Яна бир муҳим жиҳати, фаолиятида коррупциявий жиҳатларга барҳам бериш мақсадида Чакана савдо ва хизмат кўрсатиш соҳасида ҳуқуқбузарликларни профилактика қилиш бош бошқармаси ҳамда унинг ҳудудий бўлинмалари тугатилди. Қолаверса, Давлат солиқ хизмати органлари ходимларининг малакасини ошириш ва моддий рағбатлантириш масалалари ўз аксини топмоқда.

 Қодир ШОЙИМОВ,

O‘zLiDeP Самарқанд вилоят

Кенгаши бўлим мудири

O‘zLiDePнинг Facebook ва Instagram’даги расмий саҳифаси ҳамда Telegram’даги каналига аъзо бўлиб, сўнгги янгиликлардан хабардор бўлинг!