Зафаробод туманида донни нест-нобуд қилмай йиғиштириб олиб ғалла режасини ортиғи билан бажарган фермерларни тақдирлашга бағишланган тадбир бўлиб ўтди.

Тадбирда сўз олганлар мамлакатимиз иқтисодиётини  юксалтириш, янги иш ўринлари яратиш, аҳолининг турмуш фаровонлигини ошириш ва бозорларимиз тўкинлигини таъминлашда муносиб ҳисса қўшиб келаётган миришкорларга миннатдорчилик билдирдилар.

Шундан сўнг, тумандаги “Йўлдош Охунбобоев”, “Собир Раҳимов”, “Тинчлик”  ва “Кожа Аҳмет” сув истеъмолчилар уюшмаларининг бир гуруҳ  фермерларига “Спарк” автомашинаси  калити топширилди. Эътиборлиси, улар орасида O‘zLiDeP фаоли “Ўсмат тоғи” фермер хўжалиги раҳбари Фарход Абдуманнопов ҳам бор.

– Ўғлим 90 тонна ғалла топшириб, ғалла режасини ортиғи билан бажарди ва давлатимиз томонидан юксак мукофот билан тақдирланди, – дейди фермернинг отаси Абдуманнон Холмуродов. – Бугун у ушбу машинани менга совға қилди. Ана  шундай бахт юртимиздаги барча оталарга насиб  қилсин!         

– Жорий йилда туманимиз миришкорлари 1200 гектар ерга деҳқончилик қилиб, 27 минг 800 тонна ғалла хирмони олишни режалаштирган, – дейди туман ҳокимининг ўринбосари Нодир Ҳакимов. – Ҳозирга қадар тўпланган бошоқли дон миқдори 24 минг тоннадан ошди. Теримда 32 та комбайн  кунига ўртача 1300 тонна ҳосил йиғиштириб оляпти.

Саида УМАРАЛИЕВА,

O‘zLiDeP Жиззах вилоят Кенгаши

 матбуот котиби

O‘zLiDePнинг Facebook ва Instagram’даги расмий саҳифаси ҳамда Telegram’даги каналига аъзо бўлиб, сўнгги янгиликлардан хабардор бўлинг!