Улуғбек Исабоев Пахтабод туманидаги кўзга кўринган тадбиркорлардан бири. У ишбилармонларга кўрсатилаётган имкониятлардан оқилона фойдаланиш мақсадида ўзи истиқомат қилаётган Дўстлик маҳалласига яқин ҳудуддаги бўш турган бинони “ноль” қийматида олиб, маиший хизмат кўрсатиш йўналишида фойдаланишни йўлга қўймоқчи. Айни масала O‘zLiDeP Пахтаобод туман Кенгаши томонидан ташкиллаштирилган сайёр қабулда ўз ечимини топди.

– Бугун нафақат бўш турган бино масаласида қилган мурожаатим ҳал бўлди, балки мутасаддилар имтиёзли кредит олишимга ҳам кўмаклашишга ваъда бердилар, – дейди тадбиркор. – Тақдим этган лойиҳам асосида янги иш ўринлари яратиб, ёшлар бандлигини таъминлаш ниятидаман.

Муаззинбой маҳалласида яшовчи Чинорахон Мелиқўзиева ҳам сайёр қабулга келиб муаммосига ечим топди. У анчадан буён 2 нафар фарзанди учун нафақа пулини ололмаётганди. Маҳалла масъуллар билан бир неча бор бу борада келишмовчиликкка ҳам борган. Фуқаронинг мурожаати партия Пахтаобод туман Кенгаши раиси, Халқ депутатлари Пахтаобод туман Кенгаши депутати Феруза Мирзараҳимова томонидан назоратга олиниб, жойида маҳалла мутасаддилари билан ҳал этилди.

Сайёр қабул давомида тумандаги Бобур, Қўқонқишлоқ, Юқори, Нодирабегим, Кўктўнлик, Тинчлик, Қорашаҳ, Шомат маҳаллалалари аҳолиси вакилларининг ҳам қатор муаммоларига ечим топилди.

Олимжон ТАЛИПОВ,

O‘zLiDeP Андижон вилоят

Кенгаши ходими

O‘zLiDePнинг Facebook ва Instagram’даги расмий саҳифаси ҳамда Telegram’даги каналига аъзо бўлиб, сўнгги янгиликлардан хабардор бўлинг!