Олмазор туманидаги “Қуёш” маҳалла фуқаролар йиғини биноси кўпдан бери таъмирталаб ҳолатда эди. Бу эса ҳудудда яшовчи фуқаролар учун бироз  ноқулайлик туғдирарди.

Шу боисдан Президентимиз томонидан ишлаб чиқилган “Обод маҳалла” дастури доирасида мазкур ҳудудда ҳам кенг кўламли ободонлаштириш ва кўкаламзорлаштириш ишлари олиб борилди. Хусусан, Халқ депутатлари Олмазор туман Кенгашидаги партия депутатлик гуруҳи аъзоси, тадбиркор Маруфжон Мирзаҳмедов саъй-ҳаракати билан маҳалла гузари янгидан бунёд этилди.

– Мазкур маҳаллада 8 мингга яқин аҳоли истиқомат қилади, – дейди партия Олмазор туман Кенгаши аппарат раҳбари Жасур Кадиров. – Айни чоғда маҳалла идораси биносида оталар чойхонаси, милиция таянч пункти, сартарошхона ва тикувчилик хоналари фаолият юритяпти. Маҳаллада тадбиркорлик фаолияти билан шуғулланиш истагида бўлган ёшлар ва хотин-қизлар учун маслаҳат маркази ҳам ташкил этилган.

Таъкидлаш керак, бугун аҳолининг таклиф-мулоҳазаларини инобатга олган ҳолда, халқ ноиби М.Мирзаҳмедов ташаббуси билан замонавий типдаги мактабгача таълим муассасасини қуриш ишлари олиб борилаётир. Мақсад битта – аҳолининг яшаш шароитини яхшилаш, ёшларни ҳар томонлама баркамол қилиб вояга етказишдир.

Муроджон ЎРИНОВ,

O‘zLiDeP Тошкент шаҳар

Кенгаши матбуот котиби

O‘zLiDePнинг Facebook ва Instagram’даги расмий саҳифаси ҳамда Telegram’даги каналига аъзо бўлиб, сўнгги янгиликлардан хабардор бўлинг!