O‘zLiDeP Бухоро вилоят Кенгаши сиёсий таълим маркази партия туман Кенгаши аппарат раҳбарлари, Халқ депутатлари туман Кенгашидаги партия депутатлик гуруҳи аъзолари ҳамда БПТ раисларининг малакасини оширишга қаратилган ўқув-семинар ташкил этди.

Семинарда иштирокчиларга “Сиёсий партиялар тўғрисида”, “Халқ депутатлари вилоят, туман ва шаҳар Кенгаши депутатининг мақоми тўғрисида”ги ва “Маҳаллий давлат ҳокимияти тўғрисида”ги қонунлар мазмун-моҳияти ҳақида кенгроқ тушунчалар берилди.

Шундан сўнг, иштирокчилар гуруҳларга бўлинган ҳолда партия тизимида аёллар ва ёшлар билан ишлаш, депутатлар ташаббускорлигини ошириш, бошланғич ташкилотлар ишини кучайтиришга қаратилган иш ва режаларни белгилаш каби масалалар юзасидан аниқ таклифларни ўртага ташлаб, ўзаро фикр алмашдилар.

– Сиёсий партия ходими энг аввало, ўз ташкилотининг Устави, Ҳаракат дастури, мақсад ва вазифаларини теран англаши керак, – дейди O‘zLiDeP Бухоро туман Кенгаши раиси У.Шомуродов. – Шундагина у электоратимиз вакилларини ўйлантириб келаётган муаммоларни ҳал этади, одамларни рози қилади. Шу боис, семинар давомида ўзимизни қизиқтирган саволларга малакали мутахассислар томонидан атрофлича жавоб олишга ҳаракат қилдик. Энг муҳими, нафақат сиёсий билимларга, балки ҳуқуқий ва иқтисодий билимларга ҳам эга бўлдик.

Семинарда шунингдек, иштирокчилар партия фаолиятига оид ҳужжатлар билан ишлаш, партия томонидан эълон қилинган лойиҳаларни амалга ошириш, партия ходимларининг нотиқлик санъати ва нутқ маданиятини ўстиришга оид зарур билим ва кўникмаларга ҳам эга бўлишди.

Шамшод ЖАФАРОВ,

O‘zLiDeP Бухоро вилоят Кенгаши

матбуот котиби

O‘zLiDePнинг Facebook ва Instagram’даги расмий саҳифаси ҳамда Telegram’даги каналига аъзо бўлиб, сўнгги янгиликлардан хабардор бўлинг!