O‘zLiDeP Хоразм вилоят Кенгаши “Устоз-шогирд анъаналари – ҳунармандчиликни ривожлантиришнинг муҳим асосидир” мавзуида очиқ мулоқот ўтказди.

Мулоқотда ҳунармандлар солиқ органлари билан вужудга келаётган муаммолар, имтиёзли кредит олишда банк ходимларининг овора қилишлари, кредит олишда гаров масалалари ҳақида фикр билдирди.

–Ўтган йили Ҳунармандлар уюшмаси аъзолари сони 110 нафарни ташкил қилган бўлса, жорий йилнинг 8 ойи давомида улар 305 нафарга етди,  – дейди Хива шаҳар ва туман Ҳунармандлар уюшмаси бўлими бошлиғи Марямжон Аминова. – Ҳозирда ҳунармандчиликнинг йўқолиб бораётган 34 иш фаолият турларини қайта тиклаш мақсадида вилоятлардан ҳунармандлар таклиф қилинмоқда. Қолаверса, яқинда Ичан қальанинг Оллақулихон карвон саройи ичида ҳунармандлар маркази ҳам ташкил қилинди.

Амалий мулоқотдан сўнг иштирокчилар “Обод маҳалла” дастурига киритилган Гиламчи маҳалласида янги ташкил этилган “Хива олтин тупроқ” хусусий корхонасига қарашли тикувчилик цеҳи фаолияти билан танишди.

Сурайё Жуманиязова раҳбарлик қилиб келаётган мазкур цех 2016 йилда тижорат банкининг 50 млн. сўмлик кредити эвазига ташкил этилган. Айни чоғда цехда ётоқ анжомлари, эркаклар учун костюм-шимлар, аёллар либослари, мактаб формалари, ёстиқ-жилдлар ҳамда чойшаблар ишлаб чиқарилмоқда.

–Ўтган йили 80 млн сўм миқдоридаги маҳсулотларимизни ички бозорга топширган бўлсак, жорий йилнинг ўтган даври мобайнида 180 млн сўмлик шартнома бажардик, – дейди С.Жуманязова. –Йил оҳирига қадар эса 400 млн. сўмлик маҳсулотлар ишлаб чиқаришни режалаштирганмиз.

Таъкидлаш керак, ёш тадбиркор яқинда болтиқбўйи давлатлари Эстония, Латвия, Литва давлатлари билан 75 минг долларлик шартнома қилишга ҳам улгурди. Шу йилнинг октябрь ойидан бошлаб маҳсулотлар экспортга чиқарилади.

Сайёра МАШАРИПОВА,

O‘zLiDeP Хива шаҳар Кенгаши

аппарат раҳбари

O‘zLiDePнинг Facebook ва Instagram’даги расмий саҳифаси ҳамда Telegram’даги каналига аъзо бўлиб, сўнгги янгиликлардан хабардор бўлинг!