Бугун Ўзбек Миллий академик драма театрида Тадбиркорлар ва ишбилармонлар ҳаракати – Ўзбекистон Либерал-демократик партияси Сиёсий Кенгаши Ижроия қўмитаси ва Тошкент шаҳар Кенгаши ҳамкорлигида 1 октябрь — Ўқитувчи ва мураббийлар куни муносабати билан “Устозлар сизга таъзим” мавзусида байрам тадбири ташкил этилди. 

Унда O‘zLiDeP Сиёсий Кенгаши Ижроия қўмитаси ва партия Тошкент шаҳар Кенгаши ходимлари, Халқ депутатлари Тошкент шаҳар Кенгашидаги партия депутатлик гуруҳи аъзолари, умумтаълим мактаби, ўрта махсус ва олий ўқув юртлари ўқитувчилари, тадбиркор ва фермерлар ҳамда кенг жамоатчилик вакиллари иштирок этди. 

Тадбирни O‘zLiDeP Сиёсий Кенгаши Ижроия қўмитаси раиси Актам Хаитов кириш сўзи билан очиб, ўқитувчилик касби, унинг машаққатлари ҳақида гапирди.

Таъкидланганидек, кейинги йилларда Президентимиз раҳнамолигида баркамол авлодни тарбиялаш, малакали кадрлар тайёрлашнинг муҳим воситаси сифатида таълим соҳасини тубдан ислоҳ этишга алоҳида эътибор қаратилмоқда. Бу жараёнда ҳаётга татбиқ этилаётган изчил ислоҳотлар кўлами ва мазмун-моҳияти билан мамлакатимизда ҳеч кимдан кам бўлмаган ва кам бўлмайдиган навқирон авлодни вояга етказишда муҳим омил бўлмоқда.

Бундан ташқари, Президентимиз томонидан ишлаб чиқилган “Обод қишлоқ” ва “Обод маҳалла” дастури доирасида мамлакатимиздаги умумтаълим мактабларининг деярли барчаси капитал реконструкция қилиниб, замонавий андозалар асосида кўплаб янги мактаблар қурилди. Мактабгача таълим муассасалари, махсус мактаб-интернатлар, “Баркамол авлод” болалар марказлари, спорт, мусиқа ва санъат мактаблари, педагог ходимларни қайта тайёрлаш ва малакасини ошириш институтларининг моддий-техник базаси мустаҳкамланиб, уларнинг фаолияти давр руҳига мос тарзда йўлга қўйилди. Бу ўзгариш ва янгиланишлар мамлакатимиз тараққиётининг янги даврида таълим тизимига кўрсатилаётган эътибор ва ғамхўрликнинг яққол исботидир.   

Бугунги кунда таълим ахборот-коммуникация технологиялари ва масофавий таълим асосида ривожланмоқда. Шу боис аввало ўқитувчини илғор педагогик технологиялар ва интерфаол усуллардан унумли фойдаланадиган ижодкор-устоз даражасига кўтаришга алоҳида эътибор қаратилмоқда. Чунки бугунги ўқувчига янги фикр, янги маълумот, янги услуб керак. 

Тадбирда сўз олган азиз устозлар ва мураббийлар аввало эътибор учун миннатдорчиликларини изҳор этишаркан, давлатимиз томонидан уларга берилаётган имтиёзлар, яратилаётган шароитларга муносиб жавоб қайтаришлари, Ватанга садоқатли, билимли ёшларни тарбиялаб вояга етказишлари тўғрисида гапириб ўтишди.

Тадбир якунида партия томонидан бир гуруҳ фахрий профессор-ўқитувчилар, устозларга эсдалик совғалари тақдим этилди. Тадбир иштирокчиларига байрам концерти намойиш этилди.

ФОТОЛАВҲАЛАР

O‘zLiDeP Тошкент шаҳар

 Кенгаши матбуот хизмати

O‘zLiDePнинг Facebook ва Instagram’даги расмий саҳифаси ҳамда Telegram’даги каналига аъзо бўлиб, сўнгги янгиликлардан хабардор бўлинг!