Урганчда “Халқ депутатлари маҳаллий Кенгашларидаги энг фаол депутат” ва “Энг намунали бошланғич партия ташкилоти” танловининг туман босқичи бўлиб  ўтди.

–Танлов давомида энг муносиб халқ ноибларини аниқлаш жуда мушкул бўлди, – дейди O‘zLiDeP Урганч туман Кенгаши аппарат раҳбари Гулистон Адамбаева. – Сабаби, депутатларимизнинг ҳар бири халқ манфаатлари йўлида туну кун хизматда, сайловчиларнинг меҳрини қозонган. Лекин шунга қарамай номзодлар орасидан партия депутатлик гуруҳи аъзоси Абдулла Рўзметовни энг фаол депутат деб топдик. Чунки депутат томонидан жорий йилнинг шу кунига қадар 29 та сўров чиқарилиб, уларнинг барчаси қаноатлантирилган.

Дарҳақиқат, депутатнинг халқ манфааати йўлида қилган амалий ишлари кўп. Масалан, унинг кўмагида Ғойбу қишлоғининг трансформатори қайта таъмирланди, 3 маҳалланинг электр токи яхшиланди. Энг муҳими, “Ҳар бир оила тадбиркор”, “Ёшлар-келажагимиз” Давлат дастурлари доирасида 20 нафардан ортиқ ёш доимий иш билан таъминланди.

Танловда шунингдек, “Қайчили” МФЙ қошидаги қуйи бўғин “Энг намунали бошланғич партия ташкилоти” деб топилди.

Нилуфар ДЖАББАРОВА,

O‘zLiDeP Хоразм вилоят Кенгаши

матбуот котиби

O‘zLiDePнинг Facebook ва Instagram’даги расмий саҳифаси ҳамда Telegram’даги каналига аъзо бўлиб, сўнгги янгиликлардан хабардор бўлинг!