Ядгора Юнусова Андижон шаҳридаги оилавий тадбиркорликни йўлга қўйган ишбилармонлардан бири. У атрофидаги шогирдлари билан бирга ўз уйида болалар учун кийимлар ва чойшаблар тикиб, ички бозорга чиқармоқда. Тайёрлаган сифатли маҳсулотлари харидоргирлиги билан ажралиб туради.

Фаолиятини яхшигина йўлга қўйган тадбиркорнинг бир муаммоси бор. Турмуш ўртоғининг вафотидан кейин икки нафар имконияти чекланган фарзандининг дори-дармони, рўзғор камларидан ортиниб, уй олишга қурби етмаяпти. Тадбиркорнинг мазкур муаммоси O‘zLiDeP Андижон шаҳар Кенгашида “Аёллар қаноти” ташаббуси билан ташкил этилган “Тадбиркор аёл – оила фаровонлиги кафолоти” мавзусидаги давра суҳбатида атрофлича ўрганиб чиқилди.

– Яхшики, партияга ўз вақтида аъзо бўлганман, – дейди тадбиркор аёл. – Айни кунгача керакли тавсия ва кўмагини аямаган O‘zLiDeP бу гал ҳам менга ёрдам берди. Депутатлар ёрдами билан муаммойим ҳал қилинадиган бўлди.

Ишбилармон аёл келгусида фаолиятини имконияти чекланганлар учун бошланғич тўловсиз бериладиган арзон уй-жойлардан бирида давом эттиради.

Умидахон ИСАЕВА,

O‘zLiDeP Андижон вилоят

Кенгаши бўлим мудири