“DIMAX” бизнес маркази ташаббуси

16.03.2019, 12:52

“DIMAX” бизнес маркази ташаббуси

Айни пайтда тараққиёт маромини теран ҳис этадиган, юртимиз иқтисодиётига фаол инвестицияларни жалб қилиб, фаолиятини кенгайтиришга ва шу орқали мамлакатимиз иқтисодий юксалишига оз бўлса-да ҳисса қўшишга шай бўлган тадбиркорлар талайгина. Пойтахтимизнинг Учтепа туманида жойлашган “DIMAX sanoat savdo ko‘rgazma biznes markazi” масъулияти чекланган жамияти ҳам ана шундай тадбиркорлик субъектларидан бири.

Эътиборлиси, ишлаб чиқариш, кўргазма-савдо, доимий фаолият юритувчи ярмарка, консалтинг, логистика ва бошқа хизмат турларини ташкил этишда кўмак­лашиш ҳамда комплекс хизматларни ўз ичига олган мазкур жамият бир қатор хорижий компаниялар билан манфаатли келишувларга эришган.

Хусусан, 2019-2020 йилларда маж­муа ҳудудида инновацион технологияларни жорий қилган ҳолда Туркиянинг “Imisk ithalat ihsarat tikaret ve nakliyat a.s” корхонаси билан 5 миллион АҚШ доллари миқдорида қурилиш маҳсулотлари ва ускуналарини сотиш ва халқаро инновацион кўргазмаларни ташкил этишга мўлжалланган савдо маркази қуриш, шунингдек, “Бизнес-акселератор” бўйича меморандум имзоланган. Қолаверса, “Bog‘azici Ihtisas Fuarcilik Limited s`irketi” компанияси билан имзоланган ҳамкорлик шартномасига мувофиқ жорий йилда тўрт маротаба инвестицион ва инновацион ишлаб чиқариш ускуналари кўргазмаларини ўтказиш режалаштирилган. Таъкидлаш керак, бу қадамлар юртимиз тадбиркорлари учун ўзларига муносиб бизнес ҳамкор топиш учун қулай имкониятдир.

Куни кеча Тошкент шаҳар ҳокимлигида юқорида тилга олинган турк компаниялари вакиллари билан амалий учрашув бўлиб ўтди.  

Унда ҳокимлик инвестиция бошқармаси ҳамда туризм департаменти мутасаддилари мамлакатимизда кейинги йилларда тўғридан-тўғри инвестицияларни жалб этиш учун энг қулай инвестиция муҳитини шакллантириш мақсадида иқтисодиётни либераллаштириш, давлат бошқарувини ислоҳ қилиш, тадбиркорлик субъектлари фаолиятига аралашувни чеклаш ҳамда солиқ ва божхона тизимида амалга оширилаётган кенг кўламли ислоҳотлар хусусида фикр юритдилар.

Шундан сўнг лойиҳанинг мақсади, самараси ва пировард натижаси хусусида ўзаро фикр алмашилди. Мазкур масала юзасидан томонларни қизиқтирган саволларга атрофлича жавоб қайтарилди.

– Мазкур учрашувни ташкил этишимиздан кўзланган асосий мақсад, ­Президентимизнинг 2018 йил 15 августдаги “Тошкент шаҳрида инвестицион муҳитни яхшилаш бўйича экспериментни амалга ошириш чора-тадбирлари тўғрисида”ги фармонидан келиб чиқиб, ҳозирги кунда “DIMAX” МЧЖда мавжуд бўлган 8,6 фоиз давлат улушини туркиялик инвес­торларга сотишдан иборат, – дейди мазкур жамият раҳбари Дилшод Шоумаров. – Ушбу лойиҳа муваффақиятли амалга оширилса, кўплаб янги иш ўринлари яратилади. Айниқса, ушбу лойиҳалар қурилиш соҳасида фаолият олиб бораётган тадбиркорларимиз учун айни муддаодир. Боиси, биргина  “Bog‘azici Ihtisas Fuarcilik Limited s`irketi” билан апрель ойида ўтказиладиган кўргазмаларда Туркиянинг қурилиш материаллари ишлаб чиқаришга ихтисослашган 80 га яқин компаниялари иштирок этиши кутилмоқда. Бу эса тадбиркорларимизга қулай бизнес ҳамкор топишда қўл келади. Қолаверса, туманимизнинг ижтимоий-иқтисодий ривожланишига ижобий таъсир кўрсатади.

Учрашувда ушбу инвестицион лойиҳани самарали амалга оширишга доир масалалар муҳокама қилиниб, ўзаро ҳамкорликни янада кучайтиришга келишиб олинди.

  • Кўрилди
    1639
  • Чоп этиш
  • Дўстлар билан улашиш
← Орқага қайтиш

Фикрингизни қолдиринг

Расмдаги мисолнинг жавобини киритинг, агар расмдаги сонлар кўринмаса "Ctrl+F5" тугмасини босинг.

+