O‘zLiDeP Оқдарё туман Кенгаши “Ҳар бир оила – тадбиркор” дастури доирасида “Тадбиркорлик, жумладан оилавий тадбиркорликни ривожлантиришда тижорат банкларининг ўрни” мавзусида очиқ мулоқот ўтказди.

Тегишли соҳа вакиллари, O‘zLiDeP депутатлик гуруҳи аъзолари, “Микрокредитбанк” Лойиш филиали ходимлари, тадбиркор ва фермерлар иштирок этган тадбирда дастур доирасида туманда амалга оширилаётган ишлар хусусида сўз юритилди.

–Дастур доирасида 2018 йилда 21 нафар фуқарога 599 млн. 980 минг сўм миқдорида имтиёзли кредитлар ажратилди, – дейди “Микрокредитбанк” Лойиш филиали бошқарувчиси ўринбосари Мақсуд Қаршиев. –Жорий йилнинг февраль ойида эса 2 нафар фуқарога 56 млн. 100 минг сўм миқдорида имтиёзли кредитлар ажратилди.

Мулоқот давомида дастур асосида 2018 йилда кредит олиб, фаолият бошлаган тадбиркорлар ўз тажрибалари билан ўртоқлашди.

–Ўтган йили “Микрокредитбанк” Лойиш филиалидан йиллик 7 фоизли 17 млн. сўм миқдорида кредит олиб, 6 сотих майдонда иссиқхона барпо этдик, – дейди оқдарёлик Зарина Содиқова. – Иссиқхонага ўтган йилнинг ўзида помидор, бодиринг, кўкат етиштириб 27 млн. сўмлик  даромад олдик. Жорий йилда иссиқхонадан унумли фойдаланиб даромадимизни икки баробарга оширишни режалаштиряпмиз.

Мулоқотда шахсий томорқалардан самарали фойдаланиб келаётган, деҳқончиликда катта тажриба тўплаган миришкорларнинг  тажрибаларини доимий равишда оммалаштириб боришга келишиб олинди.

Қодир ШОЙИМОВ,

O‘zLiDeP Самарқанд вилоят

Кенгаши бўлим мудири