Данғара туманида “Коррупция- тараққиёт душмани” мавзуида давра суҳбати ташкил этилди.

Халқ депутатлари Данғара туман Кенгашидаги O`zLiDeP депутатлик гуруҳи аъзолари, туман ИИБ ходимлари иштирок этган тадбирда коррупциянинг олдини олиш ва унга қарши курашиш жараёнларига фуқароларни, айниқса ёшларни кенг жалб этиш, бу салбий иллатни бутунлай йўқ қилишда барча бирдек ҳаракат қилиш борасида сўз юритилди.

 Тадбирда “Коррупцияга қарши курашиш тўғрисида”ги қонунда “коррупция”, “коррупцияга оид ҳуқуқбузарлик”, “коррупцияга қарши курашиш”, “манфаатлар тўқнашуви” каби тушунчаларнинг аниқ ва тўлиқ баён этилгани таъкидланди. Бу тушунчаларни ҳар бир фуқаро билиши учун аҳолининг ҳуқуқий онги ва маданиятини ошириш, жамиятда коррупцияга қарши муросасизлик муносабатини шакллантириш зарурлиги қайд этилди.

- Ўзбекистон Республикасининг “Коррупцияга қарши курашиш тўғрисида”ги қонунини аҳолига кенг тушунтириш ишларини янада кучайтириш зарур, – дейди O`zLiDeP Данғара туман Кенгаши аппарат раҳбари З.Қўзиева. – Ўтказилаётган тарғибот тадбирларида ўқувчи ёшларни фаол иштирок этиши яхши самара беради. Ўсиб келаётган ёш авлодда коррупцияга қарши курашиш, унинг салбий оқибатларини етказиш ҳар бир ташкилотнинг муҳим вазифаси бўлиши зарур.

Шунингдек, коррупцияга қарши курашиш ва унинг олдини олиш борасида мамлакатимизда амалга оширилаётган кенг кўламли чора-тадбирлар тўғрисида маърузалар тингланди. Тадбир сўнггида ёшларни қизиқтирган саволларга мутасаддилар томонидан атрофлича жавоблар қайтарилди.

Аброр ОТАБОЕВ,

O‘zLiDeP Фарғона

вилояти Кенгаши

 масъул ходими