Аввал хабар берганимиздек, пойтахтимизда O‘zLiDeP Сиёсий Кенгаши Ижроия қўмитаси ҳамда партиянинг парламентдаги фракциясининг кенгайтирилган қўшма мажлиси бўлиб ўтмоқда.  

Йиғилишда сўз олган тадбиркорлар ва ишбилармонлар, журналистлар ўзларини қизиқтирган саволлар билан соҳа мутахассисларига мурожаат қилишди.

Илёсхон АЗИЗОВ,

Халқ депутатлари Миробод туман Кенгашидаги O‘zLiDeP депутатлик гуруҳи аъзоси, “Orif Tex” МЧЖ раҳбари:

–Бугун Президентимиз деярли ҳар бир йиғилишда тўғридан-тўғри хорижий инвестициялар жалб қилиш ишларини жадаллаштириш бўйича тўхталиб, мамлакатда инвестиция жалб этиш кераклигини таъкидламоқда. Қайси бир давлатга бормасалар, қайси давлат ва ҳалқаро ташкилотлар раҳбарлари билан учрашмасинлар, бу масала албатта, диққат марказлари турибди. Лекин биз у кишининг номзодини илгари сурган, яратилишида уларнинг ўзлари фаол иштирок этган партия сифатида У кишига қанчалик дастак бўла оляпмиз? Ҳозирги кўраяётган дастурий ҳужжатларимизда ҳам бу борадаги умумий мулоҳазалардан узоқ кетилмагандек туюляпти. Биз ўзи нимани таклиф этаяпмиз. Инвестицияни жалб этишда партиямизнинг, депутатларимизнинг ўрни қандай бўлиши керак?  

Мисол учун. Инвестиция дастурларини ишлаб чиқиш ва мониторинг қилиш жараёнига илғор ахборот-коммуникация технологиялари татбиқ этилмаган. Ҳудудлар кесимида давлат хусусий сектор инвестиция лойиҳаларини амалга оширилаётгани, янги инвесторларга таклиф килинаётган лойиҳалар онлайн базаси умуман йуқ. Бундаги шаффофликнининг йўқлиги эса, соҳадаги муаммолар тизимли ечилмаятганидан далолат беради.

Комилжон ЭРНАЗАРОВ,

Олий Мажлис Қонунчилик палатаси депутати:

–Дарҳақикат “Ўзбекистон Республикаси инвестиция дастурини шакллантириш ва амалга оширишнинг сифат жиҳатидан янги тизимига ўтиш чора-тадбирлари тўғрисида”ги Президент Фармони асосида босқичма-босқич вазирликлар, давлат бошқарув органлари ва ташкилотлари, маҳаллий ижро ҳокимияти органлари томонидан амалга оширилиши керак бўлган барча кўрсатмалар ва уларни амалга ошириш муддатлари белгилаб кўйилган.

Партия дастури лойиҳасида инвестиция масаласига алоҳида эътибор бериш таклиф этилган, тегишли дастурларни ҳудудлар кесимида халқ депутатлари маҳаллий кенгашларининг бевосита иштирокида ишлаб чиқиш ва қабул қилиш, унинг бажарилиши юзасидан кучли депутатлик ва жамоат назоратини ўрнатиш кўзда тутилган.

Яна бир гап. Партия дастурида инвестиция борасида факат давлат органлари билан ишлаш оркали масалаларга ечим топиш билан чегараланмаган ҳолда ташаббускорликни қўлга олиб Invest-in-Uzbekistan онлайн платформасини янада ривожлантириш, тадбиркорларнинг инвестицион таклифларини ўрганиб чиқиб, қўллаб-қувватлаш кўзда тутилган. Сиз айтаётган шаффофлик айнан шу ҳолларда намоён бўлади.

Одилжон АШУРОВ,  

“Техно саноат” МЧЖ директор ўринбосари:

–Жамиятимизни кемирадиган, ривожига тўсиқ бўладиган энг катта иллат – бу қайси соҳага қараманг коррупциядир. Тадбиркорларни қийнаётган масалалардан бири ҳам айнан шу муаммо. Мамлакатдаги етакчи партия сифатида биз бу иллатга қарши курашиш борасида қандай ишларни амалга оширдик? Аввалги сайловолди дастуримизда кичкинагина бўлса ҳам бир пунктча бор эди?. Нимага эришдигу, нима қилмоқчимиз бу соҳада? Бугун сайловчиларимиз биздан шу саволга жавоб кутади.

Нуриддин МУРОДОВ,

O‘zLiDeP Сиёсий Кенгаши Ижроия қўмитаси котибият мудири, Экспертлар гуруҳи раҳбари:

–Биз бу соҳада бир қанча масалаларни кўтарганмиз. Лекин қонун ҳужжатларида ҳали-ҳамон коррупция нормалари мавжуд. Ушбу нормаларни экспертизадан ўтказишнинг самарали механизми амалда йўлга қўйилмаган. У ёки бу нормаларнинг ўзи коррупция ҳолатларига йўл қўйиши, айрим давлат идораларига ортиқча ваколат берилиши ёки ваколатнинг суиистеъмол қилинишига асос яратиб бермоқда. Шу боисдан, коррупцияга қарши курашиш – бу нафақат давлат, ҳуқуқни муҳофаза қилиш органларининг вазифаси, балки бутун жамиятимизнинг ҳаёт тарзига айланишига эришишимиз зарур. Мавжуд коррупцияга қарши кураш тизими негизида, давлат раҳбари томонидан лавозимига тайинланадиган ва парламент юқори палатасига ҳисобдор бўлган мустақил давлат агентлигини ташкил этиш мақсадга мувофиқ. Чунки мавжуд идоралараро комиссия иши ўз натижадорлигини кўрсатмади. Дастуримизга шу ва бошқа шунга ўхшаш таклифларни киритмоқдамиз.

Фурқат ҚАЛАНДАРОВ,

“QUYOSHCHA-NURI” МЧЖ директори, O‘zLiDeP депутатлик гуруҳи аъзоси:

–Ҳурматли йиғилиш иштирокчилари. Келинг биз бугун очиқча мулоқот қилайлик. Мана ҳужжатлар лойиҳаларини кўриб чиқяпмиз. Лекин, кечирасизу, партиямиз дастури ва сайловолди дастурлари ҳаётий бўлиши керак. Сайловчилар, авваламбор электоратимизни ўйлантираётган масалаларни кўтариб чиқишимиз керак.

Биргина мисол. Сўнгги пайтларда Президентимиз томонидан қатор ҳаётий муҳим аҳамиятга эга, бизнинг партиямиз тамойилларига, либерализм тамойилларига тўла мос келадиган, бозор иқтисодиётига ўтишда муҳим қадам, мутлақо янги босқични бошлаб берган ҳужжатлар қабул қилинди. Мен ёқилғи-энергетика соҳасидаги ўзгаришлар тўғрисида гапиряпман. Лекин, минг афсуски, партиямизнинг ушбу соҳадаги қатъий позицияси кўринмаяпти. Дастурларда ҳам бу масалалар ечимини кўрмадик. Ваҳоланки, бу ёқилғи-энергитика учун тарифларни оширилиши масаласи ижтимоий тармоқларда муҳокама қилинаётган энг долзарб масалалар сирасига киради. Икки хил муносабат айримлар нарх ошишини мақулламаса, бошқалар табиий ҳол сифатида қабул қилмоқда. Албатта бу масала партиямиз электоратига ҳам тааллуқли масаладир. Бу ўта муҳим масалага партиямизнинг муносабати қандай, у партиянинг янгиланаётган дастурида ўз ўрнини топадими ёки йўқми?

Ҳамдамбек Расулов,

Олий Мажлис Қонунчилик палатаси депутати:

–Раҳмат саволингиз учун. Ҳақиқатдан хам бу масала ўта долзарб. Лекин фикрингизга қисман қўшиламан. Бу масалада фракциямиз ва партиямиз ўзининг қатъий муносабатини билдириб бўлган. Лекин уни аҳолига етказиш, қабул қилинаётган қарорларнинг нақадар муҳимлигини тушунтириб беришда фаоллигимиз етишмаётгандир.

Таъкидлаш жоизки, биргина 2017-2018 йилларда газ қазиб олишнинг ўсиши прогноз кўрсаткичларига нисбатан 42 фоизни ташкил этган холос. Сўнгги 20 йилда табиий газ қазиб олиш ҳажми 8 фоизга ошгани ҳолда мамлакат корхоналари томонидан уни қазиб олиш ҳажми 29 фоизга пасайган. Ўтган 5 йил давомида табиий газнинг табиий захиралари ўрнини тўлдириш бўйича ўртача кўрсаткич 70 фоизга яқин ҳажмни ташкил этди.

Соҳадаги камчиликларнинг энг асосий омили бу – соҳага бозор механизмлари татбиқ этилмаганлиги, тарифларни бозор бошқариши керак, шундагина бу соҳада ҳам рақобат бўлади, монополия йўқолади. Бундан барча, охир оқибатда, аҳоли ҳам манфаатдор бўлади. Партиямиз ҳам айнан шуни тарафдори. Тарифларнинг ошиши бу бозор талаби, талаб ва таклиф ўртасидаги номувофиқлик, тарифларни маъмурий йўсинда эмас, бозор меҳанизмлари орқали бошқариш лозим.

Биз асосий эътиборни хусусий сектор улушини ушбу соҳага кенг жалб этиб, келажакда таннарх ва сотиш нархи ўртасидаги катта фарқни йўқ қилишга қаратишимиз лозим. Партия сайловолди дастурига ушбу ва соҳага оид бошқа таклифлар ҳам киритилмоқда.

O‘zLiDeP матбуот хизмати