O‘zLiDeP Фарғона вилоят Кенгаши томонидан Фарғона Политехника институтида “Менинг биринчи овозим!” шиори остида сайловолди тарғибот тадбири ўтказилди.

Унда партия вилоят Кенгаши ходимлари, маҳаллий кенгаш депутатлари, бошланғич партия раислари, ўқитувчи ва мураббийлар ҳамда талаба-ёшлар иштирок этди.

Тадбирда сўз олган O‘zLiDeP Фарғона вилоят Кенгаши раиси Р.Камолов иштирокчиларни партиянинг янги сайловолди дастури билан таништирди. Шунингдек, Сайлов кодекси тўғрисида, партия фаолияти ва сайлов кампанияси даврида амалга оширилаётган ишлар ҳақида ҳам маълумотлар берди.

“Бўлажак сайловларда ёшларнинг овози ҳам муҳим аҳамият касб этади. Шу боис бу йилги сайловда фаол иштирок этиб, муносиб номзодларга овоз берамиз. Зеро, сизу бизнинг овозимиз жамиятимиз ва давлатимизнинг барқарор ривожланиши учун ниҳоятда муҳимдир”, – дейди институт талабаси Дилноза Турсунова.

Тадбир якунида O‘zLiDeP сафига қабул қилинган бир гуруҳ талабаларга партиянинг аъзолик гувоҳномаси топширилди.

Ш.ТЎХТАМАТОВ,

O‘zLiDeP Фарғона вилоят

Кенгаши матбуот котиби