Яна қанча кутиш керак? Муаммога ечим борми?

11.12.2019, 15:51

Яна қанча кутиш керак? Муаммога ечим борми?

Мингтепа археология маданий мерос объекти Марҳамат туманида жойлашган. Уни муҳофаза қилиш, тадқиқ этиш ва базасида туризмни ривожлантириш бўйича Ўзбекистон Республикаси Президентининг қатор қарорлари қабул қилинган. Мазкур меъёрий ҳужжатларда белгиланган вазифалар юзасидан қарор қабул қилинганига 11 ой бўлганига қарамай, амалий ишлар “ўлда-жўлда”. Тўғри бу ҳолат бўйича жон куйдираётганлар бор, бироқ натижа йўқ-да.

Фидойилардан бири халқ депутатлари Андижон вилоят Кенгашидаги O‘zLiDeP депутатлик гуруҳи аъзоси О.Хусанов. Унинг куюнчаклиги шунча-ю, мутассаддиларнинг бепарволиги шунча. Ахир маданий мероснинг шу қадар аҳамияти қизиқтирмайдими айрим масъулларни? Ҳатто Андижон вилоят маданий мерос бошқармасига юборилган депутатлик сўровига ҳозирга қадар жавоб берилмаётгани қизиқ?!

Депутатнинг куюнганича бор. Ахир шундай тарихий объектнинг наманганликлар тасарруфига ўтиб кетишига жим қараб туриб бўладими?

“Нуфузли лавозимдагиларнинг айтишича, наманганликлар тарихни сохталаштириш орқали қадимий Довон давлатининг ҳақиқий пойтахти деб илмий асосга эга бўлган Мингтепадан ушбу шарафли номни тортиб олиш учун қаттиқ курашмоқдалар, – дейди куюниб депутат. – Улар Ахсикентда Вазирлар Маҳкамасининг қарори чиқиши билан амалда кенг кўзламли ишларни бошлаб юборганлар. Жумладан, наманганликлар маҳаллий бюджет ҳисобидан 15 та доимий ишловчи штат ажратган, ёдгорликнинг бир қисми ёпилган. 300 метрга яқин узунликда томоша йўллари барпо этилган, кириш жойига “Ахсикент” ёзуви ўрнатилган... Эҳҳее, улар авжида ишлашяпти, - бош чайқайди у. Бизда эса ҳали ҳам амалий ишга ўтилгани йўқ!”

Биргина мисол. Вазирлар Маҳкамасининг 2018 йил 29 декабрдаги қарорида белгиланган бандларга кўра, республика ва хорижда объектга оид сақланаётган манбаларни малакали мутахассис ва экспертлар, олимларни жалб этган ҳолда тадқиқ этиш, ёдгорлик тасарруфидаги жойларни ўрганишни имкон қадар кўпайтириш зарур. Аммо бир йилда атиги 1-2 та жой ўрганилмоқда, холос.

Хўш, бу муаммо қачонгача очиқ қолади? Депутатнинг сарсонгарчилиги қачон тугайди? Саволларга жавобни мутасаддилардан кутамиз.

Зилола РАҲМОНОВА,

OzLiDeP Андижон вилоят

Кенгаши матбуот котиби

  • Кўрилди
    754
  • Чоп этиш
  • Дўстлар билан улашиш
← Орқага қайтиш

Фикрингизни қолдиринг

Расмдаги мисолнинг жавобини киритинг, агар расмдаги сонлар кўринмаса "Ctrl+F5" тугмасини босинг.

+