Бугунги кунда жаҳон афгор оммаси эътиборидаги бош мавзу коронавируснинг дунё мамлакатлари бўйлаб тарқалиши ва унинг олдини олиш чораларига қаратилган. Хабарингиз бор, Ўзбекистонда ҳам ушбу вируснинг тарқалиши олдини олиш юзасидан ҳукумат томонидан қатъий амалий чоралар кўрилмоқда. Парламент қуйи палатаси депутатлари ўзларининг ижтимоий тармоқдаги саҳифаларида воқелик юзасидан ўз муносабатларини билдириб бормоқдалар. Хусусан, Олий Мажлис Қонунчилик палатасидаги O'zLiDeP фракцияси аъзоси Дониёр Ғаниев ўзининг facebookдаги расмий саҳифасида қуйидаги фикрларни билдириб ўтди.  

– Давлат ҳокимиятининг бирдан-бир манбаи бу халқимиз эканидан келиб чиқсак, давлат халқ манфаатларини кўзлаб, биринчи навбатда, унинг соғлиғи ва хавфсизлигини таъминлаш учун хизмат қилиши лозим. Шу нуқтаи назардан, коронавирус инфекциясининг республикамизда тарқалашига қарши кураш бўйича Ҳукумат томонидан қаттиққўллик билан кўрилаётган барча карантин чора-тадбирларини мен ҳам депутат сифатида, ҳам бир фуқаро сифатида тўлалигича қўллаб-қавватлайман. Зеро, коронавирусга қарши кураш бўйича Хитой ва Европа давлатлари тажрибасидан келиб чиқиб, хулоса қиладиган бўлсак, карантин қоидаларига қатъий амал қилиш ҳозирча бу инфекцияга қарши курашишнинг энг самарали йўли ҳисобланади.

Ҳукумат томонидан белгиланган чора-тадбирлардан келиб чиқиб бугундан Олий Мажлис Қонунчилик палатаси томонидан ҳам карантин қоидаларига амал қилиш жорий этилди. Хусусан, қўмита мажлислари, фракциялар йиғилишлари, ялпи йиғилишлар ўтказилиши тўхтатилди. Олий Мажлис биносига киришда тиббий текширувлар йўлга қўйилиб, шахсий гигиена қоидаларига қатъий амал қилиш учун шароитлар яратилди.

Лекин бу фаолиятимиз тўхтади, дегани эмас. Ҳозирда Парламентда ички электрон тизим йўлга қўйилган бўлиб, барча ҳужжатларни электрон алмашинуви учун шароитлар яратилган. Шунингдек, парламентнинг ва депутатларнинг асосий фаолияти, хусусан, қонун лойиҳалари муҳокамалари, ижро ҳокимияти томонидан қонунлар ижроси назорати, фуқаролар мурожаатларини қабул қилиш ва улар устида ишлаш замонавий технологиялардан фойдаланган ҳолда электрон тарзда давом эттирилади. Парламент ва Ҳукумат ўртасидаги алоқалар ва ҳужжатлар алмашинуви Электрон ҳукумат портали орқали ўрнатилса, депутатларимизнинг фуқаролар билан алоқаси эса, уларнинг ижтимоий тармоқлар (фейсбук ва телеграмм)лардаги шахсий саҳифалари орқали давом этади.

Бир сўз билан айтганда, ҳар қандай вазиятда ҳам Халқимиз ишончини оқлашга, уларнинг манфаатини ҳимоя қилишга, жамиятимизни қийнаб келаётган масалаларни, хоҳ у монополия масаласи бўлсин, хоҳ у коррупция муаммоси бўлсин, кўтариб чиқишда, уларга адолатли ечим топиш учун курашишда давом этишдан тўхтамаймиз ( Шахсан мен бу йўлни ўзим учун танладим, демак, энди орқага чекиниш йўқ).

Қолверса, мамлакатимизда карантин ҳафталигини жорий этилиши баҳонасида, эҳтимол, оғриқли нуқталаримиздан бири бўлган “Электрон Ҳукумат” ва “Электрон Парламент” ҳамда масофавий таълим тизимларини янада ривожлантириш, уларнинг амалда қўлланилишини тезлаштириш, шунингдек, ҳудудларни тезкор ва сифатли интернет алоқаси билан таъминлаш ишларини жадаллаштиришга катта бир туртки бўлар. Зеро, ҳар бир қийинчилик ёки хавф инсонларни янги имкониятлар “ойнасини” излашга ундайди.

Хулоса ўрнида шуни айтишим мумкинки, олдимизда турган икки ҳафталик карантин муддати халқимизга яратган томонидан юборилган катта бир синов. Биз бу синовни қўрқув, ишончисизлик, ваҳима ҳисси билан ёки ирода, сабр, хотиржамлик, тартиб ва ишонч билан, бир-биримизни ҳимоялаб, асраб-авайлаб енгиб ўтишимиз мумкин. Танлов ўзимизники.

Лекин мен ишонаманки, буюк тарих, буюк давлат, буюк маданият яратган, қийинчиликлардан қўрқмайдиган, ўз бошидан кўплаб оғир синовларни ўтказган халқ сифатида бу синовни ҳам бир тану, бир жон бўлиб, аҳиллик ва якдиллик билан енгиб ўтишга қодир халқмиз. Бу синов бизни янада кучлироқ, янада аҳил миллат сифатида шаклланишимизга, бир мақсад, бир байроқ остида бирлашишимизга хизмат қилади.