Шу кеча кундузда инсоният ўз жони ва яқинларини коронавирус балосидан  асраш учун курашмоқда. Ушбу пандемия миллат, ирқ, касб ва мавқе танламасдан ўз ҳукмини ўтказмоқда. Касалликнинг ҳозирча давоси топилганича йўқ. Уни фақатгина тўғри қабул қилинган қарорлар, кучли тартиб-интизом, тозаликка қатъий риоя қилиш, бир сўз билан айтганда, ҳамжихатлик ва аҳиллик билан тўхтатиб қолиш мумкинлиги бот-бот таъкидланмоқда.

Мамлакатимизда ҳам ушбу долзарб тамойилларга сўссиз амал қилишга қаратилган зарур чора-тадбирлар татбиқ қилинаяпти. Гап инсон саломатлиги ва унинг фаровон турмуши ҳақида кетар экан, давлат бу йўлда барча функцияларини ишга солмоқда. Қилинаётган ишларни кўриб шу юрт фуқароси эканлигимдан фахрланаман.

Президентимиз томонидан шу йил 3 апрель куни қабул қилинган Фармон ҳам ушбу саъй-ҳаракатларнинг мантиқий давоми бўлди. Унга кўра, март-июнь ойларида нафақа муддати тугайдиган болали оилаларга, бола парваришлаш нафақаси ва моддий ёрдамларни тўлаш учун қўшимча мурожаат ва ҳужжатлар талаб этилмайди – автоматик тарзда 6 ойдан 1 йилгача узайтирилади. Карантин даврида ёлғиз кексалар ва ногиронлиги бўлган шахсларга 18 турдаги асосий озиқ-овқат ва гигиена товарлари бепул етказиб берилади.

Давлатимиз раҳбари Шавкат Мирзиёев раислигида жорий йил 26 март ва 3 апрель кунлари коронавирус инфекцияси тарқалишига қарши курашишни кучайтириш, коронавирус пандемияси келтириб чиқариши мумкин бўлган инқирозга қарши курашиш шароитида тадбиркорликни қўллаб-қувватлаш масалаларига бағишлаб ўтказилган видеоселектор йиғилишларида давлатимиз раҳбари халқимизга мурожаат қилиб, бу курашда тиббий чоралар билан бирга, юксак тафаккур, қатъий интизом, сабр-тоқат ва улкан масъулият кўрсатишимиз лозимлигини, бу сифатлар бизнинг энг асосий ва энг таъсирчан қуролимизга айланиши шартлигини таъкидлаб ўтди.

  Ҳақиқатдан ҳам, ушбу хасталикни енгиб ўтиш ҳамжихатликни, бирдамликни, кенг тафаккур орқали белгиланган тартиб-қоидаларга риоя қилишни тақозо этмоқда. Зотан, тиббиёт қанчалик ривожланган бўлмасин, давлат бунга қанча-қанча маблағ ажратмасин, агарда тартиб-интизомли бўлиб, карантин қоидаларига риоя этмасак, барча кўрилаётган чоралар, пандемияга қарши курашиш учун жалб этилган фидойи инсонларнинг меҳнати беҳуда кетиши мумкин. Оиламиз, фарзандларимиз, элу-юрт тинчлиги учун уйда қолайлик.

Биламиз халқимизнинг аксарият қисми ўз томорқасига эгадир. Шу маънода айтиш мумкинки, вақтинчалик карантин даврида уларда ҳеч қандай зерикиш ёки бошқа ташвишларга ўрин қолмайди. Аксинча, улар ўз томорқаларида баҳорги экинларни экиб, вақтни мазмунли ўтказадилар.

Қадрли сайловчилар, азиз юртдошлар! Сиздан имкон қадар  карантин даврида уйдан чиқмасдан яқинларимиз ёнида бўлишингизни сўраймиз. Давлат раҳбари томонидан имзоланган ҳуқуқий ҳужжатларда аниқ белгиланаётган чора-тадбирларга амал қилган ҳолда, коронавирусни ортиқча талофотларсиз енгиб ўтиш ҳар биримизга боғлиқ эканлигини асло унутманг.

Барно МИРЗАМОВА,

Олий Мажлис Қонучилик палатаси 

Аграр ва сув хўжалиги

масалалари қўмитаси аъзоси