Маълумки, 2017 йилдан бошлаб пенсионерларнинг пенсия пуллари пластик карточка шаклидан нақд пул шаклига ўтказилган эди. Бундан жуда кўплаб отахон-онахонларимиз қувонишганди. Негаки, вилоялардаги чекка қишлоқларда яшовчи пенсионерларимиз пулларини нақд пул қилишдаги муаммолардан бира тўла қутулишганди.

Аммо карантин вақтида пенсионерларимиз ўз уйларида изоляция тартибига ўтказилган бир пайтда уларнинг пенсия пуллари яна 100 фоиз пластик карточкаларга ўтказилиши ҳақидаги хабарлар тарқала бошлади. Марказий банк фармойиши билан жорий йилнинг 24 мартидан буён нақд пуллар тарқатилишидан аввал 14 кун мобайнида омборхоналарда карантинда сақлангач, пенсионерларга тарқатилаётган бир вақтда кутилмаган бу янгилик яна муаммоларни келтириб чиқаради.

Биринчидан, айрим пенсионерларимиз пластик карточкасини ишлатишни билишмайди.

Иккинчидан, пенсионер пластик карточкасини нақд қилидириш учун яна ўзи яшайдиган туман ёки шаҳар марказига бориб, банкоматдан нақд қилидиришга мажбур бўлади. Банкоматдан нақд пул олди нимаю, банкдан тўғридан-тўғри шаклда олгани нима? Янги ўзгариш қайтанга нақд пулни яна сарсонгарчиликлар билан олишга мажбур қилиш эмасми? Кейин, бозорга озиқ-овқат сотиб олишга чиқиб, оддий кўкат сотадиган сотувчига пластик узатингчи, қошини чимирмасмикан? Ёки бозорга боргунча йўналишсиз такси ёки автобусга орқали борасиз, йўл кира учун пластик узата олмайсиз. Чунки ҳайдовчиларнинг терминали йўқ.

Яна бир гап. Айрим пенсионерларимиз уйларидан чиқишга ҳам имкони йўқ. Ёки қаровчиси йўқ пенсионерлар қандай пулини нақдлаштиради?
Назаримда, бу йўл бироз нотўғри йўл. Қолаверса, пенсияларни пластик карточкаларга зудлик билан ўтказиш ишлари бир қатор қийинчиликларни ҳам келтириб чиқаради. Бунинг учун банк ходимлари ё пенсионерларнинг ҳар бирининг уйига кириб чиқиши, ё пенсионерлар «Халқ банки» филиалларига боришлари керак. Ваҳоланки, карантин даврида пенсионерларнинг уйдан чиқиши мумкин эмас. Қолаверса, чиққан тақдирда ҳам кўчада транспортлар ҳаракаланиши ҳам тўхтатилган. Пенсионерлар туман ёки шаҳар марказидаги банк идорасига пиёда боришмайдику. Банк ходимларининг ҳам қарийб ярми ҳозирда меҳнат таътилида.
Пенсия пулларини тартибга кўра омборхоналарда сақлагач, уларни гигиена қоидаларига риоя этган ҳолда тарқатилиши оқилона йўл деб, ҳисоблайман.

Фахриддин САМАДОВ,

Олий Мажлис Қонунчилик палатасидаги

O'zLiDeP фракцияси аъзоси