Коронавирус ҳаётимизга кутилмаган синовлари билан хозирча хавф солиб турибди. Лекин, ушбу хасталик асоратлари мамлакатимизда нисбатан енгил кечмоқда. Шунчаки, ўз-ўзидан бундай бўлгани йўқ албатта. Бунинг ортида пандемия билан келадиган хавф-хатарлар олдиндан тўғри баҳоланиб, шунга яраша зарур чора-тадбирлар ишлаб чиққан ҳукуматимизнинг ва албатта жонкуяр, ўз касбига содиқ шифокорларнинг машаққатли ва қахрамонона меҳнати ётибди. Бугун уларга қанча кўп миннатдорчилик билдирсак шунча кам.

Албатта касаллик ҳозирча бутунлай чекингани йўқ. Шу боис Президентимиз томонидан шу йилнинг 22 апрель куни глобал инқироз ва пандемия шароитида мамлакатимиз аҳолиси бандлиги масалаларига бағишланган видеоселектор йиғилишида коронавирус пандемиясига қарши кураш бир лаҳза ҳам тўхтатамаслиги таъкидланди. Зеро бу одамларимиз, аҳолимизнинг соғлиғи, ҳаёти билан боғлиқ ўта муҳим масала деди давлатимиз раҳбари.

Такрор бўлсада айтиш керак касалликка қарши вакцина бу - карантин қоидаларига оғишмай амал қилиш, зарурат бўлмаганда кўчага чиқмаслигимиз, одамлар тўпланадиган жойларга бормаслигимиз, бир сўз билан айтганда, вақтинчалик ўз-ўзимизни яккалашдир. Айтиш керакки, халқимизнинг бу борадаги матонати туфайли бугунги кунда вирусдан холи ҳудудлардаги бир қатор саноат корхоналарида, қурилиш майдонларида, фермер ва кластер хўжаликларида, санитар-эпидемиологик нормаларга қатъий амал қилган ҳолда, ишлар аста-секин бошланди.

Яхши биламизки, ўзбек халқи яхшилик қилиб, йиқилганни суяб, ночорга чора, йўлсизга йўл кўрсатиб, бундан қувонадиган халқдир. Бу эзгу фазилатлар қон-қонимизга сингиб кетган. Айни оғир дамларда ана шу қадриятларимиз давлат сиёсати даражасига кўтарилди. Шу мақсадда “Саховат ва кўмак” умумхалқ ҳаракати йўлга қўйилди. Ҳеч муболағасиз айтиш керакки, бу ташаббус халқимиз бирлигини, унинг беқиёс қудратини ёрқин намоён этиб, янги тарихимиз саҳифаларидан мустаҳкам ўрин олди.

Бугун қай биримизда эҳтиёжманд, кам таъминланган инсонлар ва оилаларга меҳр ва ҳурмат билан ёрдам қўлини чўзишга имконият бўлса, уни хеч иккиланмасдан ишга солайлик. Зеро, инсондан фақат яхши ном ва қилган савобли амалларигина қолади.
Шу ўринда депутат, шифокор ва она сифатида саховатпеша юртдошларимиз ва тадбиркор ҳамда фермерларимизга алоҳида чин қалбдан миннатдорчилик билдирган холда уларга яна бир бор самимий ва дилдан мурожаат қилмоқчиман.

Қадрли юртдошларим!

Бугунги оғир, синовли кунларда ёрдамга, кўмакка муҳтож инсонларни ўз муаммолари билан ёлғиз қолдирмайлик. Уларга моддий ва маънавий далда бўлайлик. Бизнинг арзимаган биргина эътиборимиз уларни эртанги кунга бўлган ишончини оширади. Яхшилик қилишдан чарчамайлик. Зеро, улуғ шоир ва мутафаккир бобомиз Алишер Навоий айтганидек, “Саховатли инсоннинг бошига жаннат дарахтлари соя солади”.

Дилбар Усмонова,

Олий Мажлис Қонунчилик

палатасидаги O'zLiDeP

фракцияси аъзоси