А.Хаитов бошчилигидаги депутатлар Наманганда Президент фармон ва қарорларининг ижросини ўрганмоқда

24.06.2020, 15:37

А.Хаитов  бошчилигидаги депутатлар Наманганда  Президент фармон ва қарорларининг ижросини ўрганмоқда

Коронавирус пандемияси даврида аҳоли, иқтисодиёт тармоқлари ва тадбиркорлик субъектларини қўллаб-қувватлаш, мамлакат аҳолиси даромадлари кескин пасайиб кетишининг олдини олиш устувор вазифа этиб белгиланди. Шу боис бу йўналишда ижтимоий ҳимояга муҳтож оилалар ва ишсиз фуқаролар аниқланиб, уларни бандлигини таъминлаш чоралари кўрилди.

Айни дамда юртимизда тадбиркорлик субъектларига берилаётган имтиёзлар ишбилармонларни изланишга, янги лойиҳаларни амалга оширишга, айниқса, янги иш ўринлари яратишга ундаяпти. Зеро, тадбиркор бу ҳақиқий фидоий инсон. У ўз иши учун кеча-ю кундуз ишлайди ва  шу йўл билан нафақат оиласини, балки эл-юртни ҳам боқади. 

Шу ўринда бир савол туғилади. Хўш, бугун вилоят, туман ва шаҳар сектор раҳбарлари томонидан аҳолининг турмуш даражаси ва сифатини яхшилаш, камбағалликни қисқартириш борасида қандай ишлар амалга оширилмоқда? Кўрилаётган чора-тадбирлар ўзини қай даражада оқламоқда? Жойларда Президент фармон ва қарорларининг ижроси тўлиқ таъминланяптими?

Олий Мажлис Қонунчилик палатаси Спикери ўринбосари, O‘zLiDeP фракцияси раҳбари Актам Хаитов  Наманган вилоятидаги учрашуви давомида тадбиркорлик субъектлари, фермер хўжаликлари ва томорқа эгаларининг фаолияти билан танишиш баробарида, мазкур ҳужжатларнинг жойлардаги ижросини ҳам ўрганди.   

Спикер ўринбосари бошчилигидаги ишчи гуруҳ аъзолари вилоятдаги учрашувини Наманган шаҳрида жойлашган “Ифтихор кийим саноат” МЧЖ фаолияти билан танишишдан бошлади.

Замонавий технологиялар билан жиҳозланган мазкур корхонада ҳозирда сифатли ва хушбичим костюмлар билан бирга, пиджак, куртка пальто ва махсус иш кийимлари ишлаб чиқарилмоқда. Эътиборлиси, 420 нафар ишчи-ходим томонидан тайёрланаётган маҳсулотлар нафақат ички бозорда, балки Германия, Австрия, Испания, Польша, Англия, Россия ва Қозоғистон давлатларига ҳам экспорт қилинмоқда.

А.Ҳаитов  ишчи-ходимлар билан суҳбатлашиб, ишлаб чиқариш жараёни, тайёрланаётган маҳсулотлар намуналарини кўздан кечирар экан, тадбиркорнинг галдаги режалари билан ҳам қизиқди.

Суҳбат ва мулоқотлар чоғида тадбиркор йилига 1 320 000 дона тайёр маҳсулот ишлаб чиқариб, экспорт ҳажмини 9 млн АҚШ долларига етказиш, энг асосийси, 900 та янги иш ўринлари яратиш ҳаракатида юрганини билдирди. Спикер ўринбосари бу ташаббусни қўллаб-қувватлаб, уларни имкон қадар тезроқ амалга ошириш юзасидан мутасаддиларга зарур тавсиялар, кўрсатмалар берди.

Ишчи гуруҳ аъзоларининг навбатдаги манзили Учқўрғон туманида жойлашган “Муҳаммадали Ҳамкор Бизнес” МЧЖ бўлди.

Мазкур корхонада "Идеал томат"  бренди остида томат, кетчуп ва мева шарбатлари қадоқланади. Корхона томонидан қадоқланаётган консерва маҳсулотларига Германия, Хитой, Россия, Франция, Латвия ва Италия каби давлатларда талаб юқори.

Тадбиркор Муроджон Ибрагимов раҳбарлик қилиб келаётган ушбу корхона ҳозирги оғир шароитда ҳам карантин қоидаларига тўлиқ риоя қилинган ҳолда иш давом этмоқда. Бу ерда меҳнат қилаётган 300 нафар ишчи-ходимлар ҳам ойлик маошларини вақтида олиб келяпти.

Спикер ўринбосари шу ерда ишчи-ходимлар билан суҳбатлашиб, уларга давлатимиз раҳбарининг фармон ва қарорлари мазмун-моҳиятини тушунтирди. Ўз навбатида, ходимларга ҳар бир ишни эҳтиёткорлик билан, карантин қоидаларига риоя қилган ҳолда бажариш зарурлигини таъкидлади.

Наманган халқи  азалдан меҳнаткаш, деҳқончиликнинг ҳадисини олган. Айниқса, Учқўрғон тумани аҳолиси томорқачиликда яхшигина тажриба орттирган.  Очиғи, қулупнай етиштиришда уларга етадигани йўқ. Аҳамиятлиси, бугун улар ўзига берилган томорқалардан самарали фойдаланиб, иссиқхоналар барпо қилиб, нафақат оиласи дастурхони, балки, бозорларга ҳам сархил ва эртаки маҳсулотлар етказиб бераётир.

Учқўрғон тумани “Файзиобод” маҳалласи “Қайки” кўчасида яшовчи  Нодирбек Хатамов 27 сотих майдонда иссиқхона қуриб, лимонария ташил этган. Ердан унумли фойдаланиш мақсадида лимонлар орасига қулупнай экиб, йилига 3 мартагача ҳосил олаяпти.  

Спикер ўринбосари раҳбарлигидаги ишчи гуруҳнинг тумандаги учрашувлари ушбу хонадонда давом этди. Халқ вакиллари хонадон эгалари билан мулоқот қилар экан, юртимиз тупроғи олтинга тенглигини айтиб, ундан йилига 3 маротабачага ҳосил олиш мумкинлигини таъкидлади.

Учрашув сўнггида хонадон эгаларига иссиқхона фаолиятини кенгайтиришда қандай муаммолар бўлса, депутатлар уларни бартараф этишга тайёрлигини билдириб, “Аҳоли томорқаларидан самарали фойдаланиш, ёпиқ ва очиқ майдонларда маҳсулот етиштириш” номли китоблар тўпламини тақдим этди.

Юлдуз Юлдашева,

O'zLiDeP Наманган вилоят

Кенгаши матбуот котиби

 

  • Кўрилди
    791
  • Чоп этиш
  • Дўстлар билан улашиш
← Орқага қайтиш

Билдирилган фикрлар

Рахманова Гульнара 2020-06-25 10:15:44

Спикер ўринбосари, УзЛиДеП Сиёсий Кенгаши райси А.Хаитов ташриф буюрган вилоят туманларида биринчи навбатда пандемия давридаги тадбиркорлик сохаси иш фаолиятлари билан танишиб бахоли маслахатлар бермокда. Албатта тадбиркорлик сохаси хар тмонлама куллаб кувватланса биринчи навбатда ахоли бандлиги, турмуш фарованлиги билан биргаликда иктисодиётнинг усишини куришимиз мумкин.


Фикрингизни қолдиринг

Расмдаги мисолнинг жавобини киритинг, агар расмдаги сонлар кўринмаса "Ctrl+F5" тугмасини босинг.

+