Андижон шаҳрида амалга оширилаётган кенг кўламли бунёдкорлик ишлари кўзни қувнатади. Айниқса, бир-биридан шинам, замонавий уй-жойларнинг қурилиши ҳудуд кўркига кўрк қўшмоқда.Бу уйлар қанча-қанча оилалар хурсандчилигига сабаб бўлмоқда.

Ана шундай хонадонларни ўз ичига олган 7 қаватли замонавий уйлар Шимолий кичик даҳадаги “Қўшариқ (9-сон)” маҳалла фуқаролар йиғинида жорий йилда бунёд этилди. 84 та хонадондан иборат 1- ва 2- кўп қаватли уйлар дилни яшнатади. Бирам чиройли, бирам шинам... аммо усти ялтироқ, ичи қалтироққа ўхшаб қолди. Нега дейсизми? Бу уйлар мана олти ойдирки, ана-мана билан газ тармоғига уланмаган. Лифт шўрлик ҳам атиги бир ойгина ишлагани чатоқ. Энди тасаввур қилинг, ёши каттароқ одамнинг юқори қаватга инқиллаб чиқиб-тушишини... Чарчоқдан кейин пастга тушгиси ёки юқорига чиққиси келмай туради.

Мутасаддиларга югур-югурлар фойда бермади. Фуқароларнинг халқ депутатлари Андижон шаҳар кенгаши депутати Жаҳонгир Жияновга қилган мурожаатлари  бесамар кетмади. Депутат муаммони ўргангач, зудлик билан масъул ташкилотга депутатлик сўрови юборди. Ечим кутиб турмади. Депутатнинг саъй-ҳаракатлари билан тез фурсатларда кўп қаватли уйга газ қувурлари тортилиб, табиий газ олиб келинди.

Энди лифт масаласини ҳам бартараф этиш керак. Яна депутат кўмакка шошди. Таъмирланиш узоққа чўзилмади.

Сайловчилар мамнун. Депутат енгил тин олди. Аҳолининг яна бир муаммосини ҳал қилгани уларнинг ишончларини оқлаётгани намунаси. Биргина “раҳмат” эшитиб, дуо олишнинг завқини юракдан ҳис қилишнинг ўзи бахт. Депутат мана шу Бахт учун яшамоқда.

Зилола РАҲМОНОВА