O'zLiDeP Тошкент вилояти Кенгаши томонидан Оҳангарон туманидаги Давлат хизматлари агентлигида “Депутатлар ва тадбиркорлар мулоқоти” форуми ўтказилди.

Унда Олий Мажлис Қонунчилик палатаси депутати, Халқ депутатлари Тошкент вилояти, туман Кенгаши депутатлари, туман Адлия  бошқармаси, Савдо-саноат палатаси, Қишлоқ қурилишбанк, Давлат Солиқ бошқармаси, Бош Вазирнинг Тадбиркорлар мурожаатларини кўриб чиқиш қабулхонаси туман бўлими, ёшлар, партия фаоллари иштирок этди.

Мулоқотда маҳаллий Кенгаш депутатлик гуруҳларининг жойларда пандемия даврида аҳолининг бандлигини таъминлаш, бизнес субъектларининг фаолиятини тиклашга кўмаклашиш, инвестицион лойиҳаларни ҳаётга тадбиқ этишда тадбиркорларни қийнаб келаётган муаммоли масалалар кўриб чиқилди.

Тадбиркор Матлуба Алиева оилавий корхонага эгалик ҳуқуқини ололмаётганлиги,  Назира Рахмонова корхонага газ етишмаслиги туфайли экспорт масаласи орқада қолаётганлигини айтиб ўтди. 

“Умид” маҳалла фуқаролари йиғини раиси, тадбиркор Машраф Зулфиев эса банк маъсулларининг масъулиятсизлигидан норози. Маълум қилишича, ижтимоий хизмат кўрсатиш шахобчаси бўлмаганлиги учун ва  2018 йил  А-373 йўлини таъмирлаш, кенгайтириш   натижасида Савдо дўкони бузилиб кетганлиги сабабли туман ҳокими қарор чиқариб берган. Шу қарор асосида, ўз ҳисобидан 250 млн. сўм ҳаражат қилиб савдо дўкони, сартарошхона ва маиший хизмат кўрсатишга мўлжалланган бинони қурилиш ишларини бошлаган, лекин маблағ етмаганлиги учун қурилиш ишлари тўхтаб қолган. Кейин “Қишлоққурилиш банк”дан 150 млн. сўм имтиёзли кредит сўраган, аммо банк томонидан 100 млн. сўм ажратилган. Шунга ҳам кўнган тадбиркорга 85 млн. сўм берилган. Тадбиркор банкда қолган 15 млн. сўмни олиш учун 580 млн. сўмга баҳолатган қурилиш биносини  қўяди ва кредит олиши борасида банк муассасасига қилган қайта мурожаати самарасиз бўлган. Натижада тадбиркорнинг биноси охиригача етказилмай қолиб кетган, катта маблағ сарфлаган тадбиркор тезроқ фаолиятини йўлга қўйишни таъкидламоқда.

Баҳс-мунозарага бой тарзда ўтган учрашувда кўтарилган масалалар бўйича депутатлар томонидан дахлдор ташкилотларга депутатлик сўрови юбориладиган бўлди.

Ахрор Тўйчиев,

O'zLiDeP Тошкент вилоят Кенгаши

матбуот хизмати