Пискент туман ҳокимлигида туманда қишлоқ хўжалиги соҳасида олиб борилаётган ислоҳотлар ва кечиктириб бўлмайдиган ишлар ижросини таъминлаш масалаларига бағишланган йиғилиш ташкил этилди.

Олий Мажлис Қонунчилик палатаси Спикери ўринбосари, Ўзбекистон фермер, деҳқон хўжаликлари ва томорқа ер эгалари Кенгаши раиси А.Хаитов ҳамда туман ҳокими Р.Рихсиев иштирок этган йиғилишда туманда қишлоқ хўжалигини келгуси йилда амалга оширилиши лозим бўлган қатор лойиҳаларнинг ижроси кенг муҳокама қилинди.

Йиғилишда туман сектор раҳбарлари, ҳоким ўринбосарлари, Халқ депутатлари туман Кенгаши депутатлари, аграр соҳа мутасаддилари иштирок этди.

Йиғилиш давомида қишлоқ хўжалиги соҳасига янги инновациялар ва лойиҳаларни татбиқ этиш бўйича 2021 йилга мўлжалланган лойиҳалар дастури тақдим этилди.

Дастурга кўра, туманда фойдаланишга киритиладиган жами 1712 гектар ер майдони мавжуд. Ушбу майдонларда боғлар, узумзорлар ташкил этиш, кўчатчилик, шоликорлик, доривор ўсимликлар етиштириш ва иссиқхоналар қуриш, балиқчиликни ривожлантириш бўйича жами 2 662 та лойиҳа киритилган.

Қишлоқ хўжалигидаги ресурслардан оқилона фойдаланиш ва янги лойиҳаларни амалга ошириш орқали 4 минг 486 нафар аҳоли бандлигини таъминлашга эришиш кўзда тутилган.

Дастурда кўзда тутилган ушбу самарали лойиҳаларнинг амалга оширилиши туман иқтисодиётининг юксалишига, аҳоли фаровонлигини таъминлашга хизмат қилади.