O'zLiDeP Наманган вилоят кенгаши “Аёллар қаноти” томонидан “Аёллар инновацион ривожланиш тарафдори” мавзусидаги навбатдаги ўқув семинарини ўтказди.

Тўрақўрғонлик хотин-қизлар иштирокида ташкил этилган беш кунлик ўқувда тадбиркорлик билан шуғулланиш истагида бўлган ҳотин-қизлар, “темир дафтари”га киритилган аёллар иштирок этиб, малакали мутахассислар томонидан ўқитилди.

Ўқув жараёнларида хотин-қизлар “Ғоядан бизнесгача” шиори остида бир-бирлари билан ўзаро фикр алмашдилар.

- Мен оилавий тадбиркорликнинг тикувчилик, зардўстлик, тўқувчилик йўналиши бўйича фаолият юритиб келаман, - дейди тўрақўрғонлик тадбиркор Муборакхон ая Нуриддинова. - Қизим ҳам ҳунармандчиликнинг сир асрорларини мендан ўрганди. Ҳозирда тадбиркорликка қизиқиши ортиб, маҳаллада бўш турган 10 нафар аёлларни “Устоз-шогирд” анъанаси асосида банд қилди. Уларга ҳунармандчилик сирларини ўргатиб келмоқда. Президентимизнинг ҳотин-қизларга бераётган имтиёзларидан фойдаланиб, кам фоизли кредит асосида корхона ташкил этмоқчиман.

Беш кунлик ўқувда иштирок этган хотин-қизлар Тўрақўрғон туманидаги “RULAN” текстиль корхонасига ташриф буюрдилар. Корхона раҳбари 34 ёшли Маҳфуза Гюмюш 200 нафардан ортиқ ҳотин-қизларни банд қилган. Ҳозирда корхонада пахталик матодан тайёрланаётган маҳсулотлар Россия давлатига экспорт қилинмоқда. Шартномада белгиланганидек, маҳсулот ҳажми ўтган йилга нисбатан 1,5 млн. АҚШ долларини ташкил этади.

Семинар иштирокчилари мазкур корхона мисолида беш кун давомида олган билимларини амалиётга қўллаб кўришди.

Муаззам Ворисова,

O'zLiDeP Наманган вилоят кенгаши

аёлларнинг сиёсий фаоллиги, жамиятдаги

ўрни ва мавқеини ошириш бўлими мудири