20 июнь куни Олий Мажлис Қонунчилик палатасининг навбатдаги мажлисида депутатлар мамлакатни ривожлантиришнинг бугунги босқичида муҳим аҳамиятга эга бўлган ва амалга оширилаётган ижтимоий ҳамда иқтисодий ислоҳотларни жадаллаштиришга қаратилган бир қатор қонун лойиҳаларини кўриб чиқдилар. Бу ҳақда Олий Мажлис Қонунчилик палатаси Ахборот хизмати хабар бермоқда.

Хусусан, кун тартибига киритилган қонун лойиҳалардан бири таълим соҳасидаги ислоҳотларнинг қонуний асосларини яратаётгани билан муҳим аҳамият касб этади. Унда таълим тизимидаги янги йўналишлар қонун билан мустаҳкамланмоқда.

Мазкур қонун лойиҳаси умумий ўрта ва ўрта махсус таълимда 11 йиллик тизимнинг мажбурийлиги, касб-ҳунар таълимининг 11 йиллик базадан сўнг ихтиёрий равишда амалга оширилиши, нодавлат таълим хизматлари кўрсатиш соҳасида фаолият кўрсатаётган юридик шахслар учун қулай шарт-шароитлар яратиш, давлат-хусусий шериклик асосида ташкил этилаётган таълим муассасалари тармоғини кенгайтириш, мазкур фаолиятни тартибга солувчи норматив-ҳуқуқий ҳужжатларни такомиллаштириш ҳамда нодавлат таълим хизматлари кўрсатиш соҳасидаги фаолиятни лицензиялаш тартибини соддалаштиришни назарда тутади.

Депутатларнинг қайд этишича, қонуннинг қабул қилиниши таълимдаги янгиланишларни ҳуқуқий жиҳатдан мустаҳкамлаб, соҳанинг янада такомиллашувига имкон беради. 

O‘zLiDePнинг Facebook ва Instagram’даги расмий саҳифаси ҳамда Telegram’даги каналига аъзо бўлиб, сўнгги янгиликлардан хабардор бўлинг!