Долзарб масалалар бўйича аниқ вазифалар қўйилди

04.07.2018, 19:35

Долзарб масалалар бўйича аниқ вазифалар қўйилди

Ўзбекистон Республикаси Президенти Шавкат Мирзиёев раислигида 4 июль куни ёшлар билан манзилли ва тизимли ишлаш, улар учун муносиб шароитлар яратиш, бандлигини таъминлаш масалаларига бағишланган видеоселектор йиғилиши ўтказилди. 

Ҳар бир ёшнинг жамиятда муносиб ўрнини топиши учун уларни қўллаб-қувватлаш ва зарур шарт-шароитлар яратишни ислоҳотларимизнинг муҳим йўналишларидан бири сифатида белгилаб, кенг кўламли амалий ишлар олиб бормоқдамиз, деди Шавкат Мирзиёев. Жумладан, “Камолот” ёшлар ҳаракати негизида Ўзбекистон Ёшлар иттифоқини туздик, ёшлар билан ишлашда янги тизим ва ёндашувларни жорий этяпмиз. 30 июнда мамлакатимизда биринчи марта “Ёшлар куни”ни кенг нишонлаб, янги ижобий анъанани йўлга қўйдик. 

Йиғилишда шунингдек, ёшлар билан ишлашда ҳали камчиликлар кўплиги ҳам қайд этилди. Жумладан, Ёшлар иттифоқи тадбирларида дабдабабозлик, юзакилик кўзга ташланаётгани, ёшлар билан манзилли ишлашга, уларнинг муаммоларини ҳал этишга етарли эътибор берилмаётгани танқид қилинди. 

Жойлардаги 4 та сектор раҳбарларининг кўпчилиги ҳали ёшлар масаласи билан тўла шуғулланмаяпти. Ички ишлар идоралари, маҳалла қўмиталари, бошқа жамоатчилик ташкилотлари ва таълим муассасаларининг ҳам бу борадаги ишлари кўнгилдагидек эмас. Туман (шаҳар) ҳокимларининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосарлари, туман ички ишлар бўлими бошлиғининг ёшлар масалалари бўйича ўринбосарлари ишини ҳам қониқарли, деб бўлмайди. Баъзи ҳолларда эса ёшлар бўйича масъул лавозимлар вакант бўлиб қолмоқда.

Бунинг оқибатида ёшларнинг ижтимоий муҳим масалалари эътиборсиз қолмоқда. Қаровсиз ва назоратсиз қолиган ёшлар томонидан турли жиноятлар содир этилмоқда. 

Шу боис Ёшлар иттифоқи, тегишли вазирлик ва идораларга ёшлар билан ишлашни такомиллаштириш, уларнинг қаровсиз ва назоратсиз қолишининг олдини олиш, улар ўртасида жиноятларни кескин камайтириш бўйича топшириқлар берилди. 

Ёшларнинг бандлигини таъминлаш, уларни меҳнат бозорида талаб юқори бўлган мутахассислик ва бизнес кўникмаларига ўқитиш бўйича Тошкент вилоятининг Қуйичирчиқ ва Тошкент шаҳрининг Чилонзор туманида янги тизим синовдан ўтказилгани қайд этилди. 

Унга кўра, мутасадди идоралар вакилларидан иборат ишчи гуруҳи тузилиб, 14 ёшдан 30 ёшгача бўлган ёшлар тўғрисидаги маълумотларни ўзида акс эттирган туман паспорти ишлаб чиқилган. Маҳаллаларда “Ёшлар меҳнат гузарлари” ташкил этиш учун бино ва ер майдонлари ажратилиб, ташаббускор тадбиркорлар жалб қилинган. Тадбиркорлик, балиқчилик, боғдорчилик, савдо-сотиқ қилиш истагидаги йигит-қизларга зарур маблағ ва ресурслар берилган. Ёшларни қийнаб келаётган 1,5 мингдан зиёд муаммолар аниқланиб, 1 мингдан ортиғи жойида ҳал этилган, қолган 500 тасини ҳам ҳал этиш чоралари кўрилган.

Ушбу тажриба натижаларидан келиб чиқиб, ёшларнинг бизнес ташаббуслари, стартаплари, ғоялари ва лойиҳаларини рўёбга чиқаришга кўмаклашиш ва қўллаб-қувватлаш, уларнинг ижтимоий-иқтисодий фаоллигини оширишга қаратилган “Ёшлар – келажагимиз” Давлат дастури қабул қилинди. 

Бу дастур 1 июлдан бошлаб, барча туман ва шаҳарларда амалга оширила бошланди. Ёшлар иттифоқи ҳузурида “Ёшлар – келажагимиз” жамғармаси ва унинг туман (шаҳар) филиаллари ташкил этилди. Жамғармага бу йил жами 770 миллиард сўм ажратилади. Жамғарма маблағларидан ёшларнинг бизнес лойиҳалари учун йиллик 7 фоиз ставка билан имтиёзли кредитлар берилади.

Дастурда ҳар бир туманда ажратиладиган кредит ҳажми ва уни олувчилар сони, кредит бериладиган фаолият йўналишлари, бунинг натижасида яратилиши зарур бўлган иш ўринларининг миқдори аниқ белгиланган. 

Шунингдек, Дастурга кўра жойларда фермерларга 1 нафардан банд бўлмаган ёшни бириктириб, унга бир гектар ер ажратиш орқали иш билан таъминлаш бўйича янги механизм жорий этиш кўзда тутилган. 

Йиғилишда шу борадаги ишларни тизимли ташкил этиш, Жамғарма маблағларидан самарали фойдаланишни доимий назорат қилиб, ёшларнинг бизнес лойиҳаларини амалга оширишга тўсқинлик қилаётган муаммоларни жойида ҳал қилиш бўйича топшириқлар берилди.

Ҳокимлар ва сектор раҳбарлари уюшмаган, ҳеч қаерда ишламайдиган ёшлар билан шахсан учрашиб, худди ўзининг фарзанди билан гаплашгандай муомала қилиб, муаммоларини ўрганиб, уларга елкадош бўлиши ва энг аввало иш билан таъминлаш чораларини кўриши лозим, деди давлатимиз раҳбари. 

Йиғилишда ёшларни маънавий баркамол этиб тарбиялаш, уларни турли зарарли оқимлар ва ёт ғоялар таъсиридан асраш масаласига ҳам эътибор қаратилди. 

Фарзандларимиз тарбияси, юриш-туришидан ҳар куни огоҳ бўлмасак, илму-ҳунарга ўргатмасак, уларнинг қўли меҳнатда қотмаса, муносиб иш топиб бермасак, ёшларни зарарли таъсирлардан ҳимоя қилиш қийин бўлади, деди Шавкат Мирзиёев.

Шу боис ёшлар билан маънавий-маърифий йўналишдаги ишларни янада жонлантириб, уларда мафкуравий иммунитетни мустаҳкамлаш, бўш вақтини мазмунли ўтказишни ташкил этиш бўйича топшириқлар берилди. Шунингдек, вояга етмаган қизлар ўртасида эрта турмуш ва ажралишларнинг олдини олиш юзасидан вазифалар қўйилди.

Видеоселекторда мутасадди ва жойлардаги раҳбарлар жам бўлгани боис айни кунлардаги яна бир долзарб масала – ғўза парвариши билан боғлиқ чора-тадбирларга ҳам тўхталиб ўтилди. 

Бу йил об-ҳавонинг қуруқ ва салқин келиши сабабли ғўза ривожи 10-15 кунга, баъзи жойларда 20-25 кунга кечиккани қайд этилди. Ғўза парваришидаги қолоқликни бартараф этиш, кафолатланган ҳосил яратиш бўйича кўрсатмалар берилди. 

Бу йил давлат томонидан олдинги йилларда бўлмаган барча шароитлар яратиб берилди, энди фермерлар ҳам шунга яраша жавоб қилиши керак. Олдингидек режанинг ортидан қувиб, даромадни ўйламайдиган, ҳисоб-китобсиз иш қиладиган фермер бизга керак эмас. Пахта бизга режани бажариш учун эмас, иш ўринларини яратиш, аҳоли даромадани ошириш, турмуш даражасини яхшилаш учун керак, деди Президент. 

Йиғилишда 5 июлдан 5 сентябрга қадар “ҳосилга-ҳосил қўшиш долзарб икки ойлиги” эълон қилинди. Бу борада амалга оширилиши зарур бўлган ишлар белгилаб олинди.

O‘zLiDePнинг Facebook ва Instagramдаги расмий саҳифаси ҳамда Telegram’даги каналига аъзо бўлиб, сўнгги янгиликлардан хабардор бўлинг!

  • Кўрилди
    515
  • Чоп этиш
  • Дўстлар билан улашиш
← Орқага қайтиш

Билдирилган фикрлар

Исомов Акрам Жиззах вилоят Кенгаши2018-07-05 15:11:14

Президентимиз ташаббуслари билан "Ёшлар-келажагимиз" Давлат дастурини қабул қилиниши ёшларнинг бизнес ташаббуслари, стартаплари, ғоялари ва лойиҳаларини рўёбга чиқаришга кўмаклашиш ва қўллаб-қувватлаш, уларнинг ижтимоий-иқтисодий фаоллигини оширишга хизмат қилади. Ушбу дастурга мувофиқ ёшлар бизнесини йўлга қўйиши учун йиллик 7 фоиз ставка билан имтиёзли кредит ажратилиши ёшларимизнинг иш билан бандлигини таъминлашга ёрдам беради.


Акбар Якубов, Жиззах вилояти2018-07-05 14:50:25

Президентимизнинг ушбу саъй-ҳаракатлар замирида Ўзбекистонимизнинг келажагини ўз елкасига оладиган, эртанги кунимизнинг равнақини таъминлайдиган ёш ўғил-қизларни шунга муносиб қилиб тарбиялаш, ёшларнинг дунёқараши юксак, билимли, ташаббускор ва меҳнаткаш бўлиб етишишлари, она ватанга муҳаббат руҳида тарбияланиш мақсади туради


А.Ўрмонова Тошлоқ тумани Кенгаши аппарат рахбари2018-07-05 13:41:56

Ҳар бир ёшнинг жамиятда муносиб ўрнини топиши учун уларни қўллаб-қувватлаш ва зарур шарт-шароитлар яратишни ислоҳотларимизнинг муҳим йўналишларидан бири сифатида белгилаб, кенг кўламли амалий ишлар олиб бормоқдамиз, деди Шавкат Мирзиёев. Жумладан, “Камолот” ёшлар ҳаракати негизида Ўзбекистон Ёшлар иттифоқини туздик, ёшлар билан ишлашда янги тизим ва ёндашувларни жорий этяпмиз. 30 июнда мамлакатимизда биринчи марта “Ёшлар куни”ни кенг нишонлаб, янги ижобий анъанани йўлга қўйдик. у дастур 1 июлдан бошлаб, барча туман ва шаҳарларда амалга оширила бошланди. Ёшлар иттифоқи ҳузурида “Ёшлар – келажагимиз” жамғармаси ва унинг туман (шаҳар) филиаллари ташкил этилди. Жамғармага бу йил жами 770 миллиард сўм ажратилади. Жамғарма маблағларидан ёшларнинг бизнес лойиҳалари учун йиллик 7 фоиз ставка билан имтиёзли кредитлар берилади.Бу борада ёшлармизга яна катта имконият эшиклари очиляпти.Ёшларни маънавий баркамол этиб тарбиялаш, уларни турли зарарли оқимлар ва ёт ғоялар таъсиридан асраш масаласига ҳар биримиз маъсулмиз


Анвар Машарипов O‘zLiDeP Янгиарик туман Кенгаши раисининг Ёшлар масалалари бўйича ўринбосари2018-07-05 10:37:49

Мухтарам Президентимиз Шавкат Мирзиёев раислигида 4 июль куни ёшлар билан манзилли ва тизимли ишлаш, улар учун муносиб шароитлар яратиш, бандлигини таъминлаш масалаларига бағишланган видеоселектор йиғилишида Ёшлар иттифоқи ҳузурида “Ёшлар – келажагимиз” жамғармаси ва унинг туман (шаҳар) филиаллари ташкил этилиши жойларда ёшларнинг бизнес лойиҳалари молиялаштиришда уларни тадбиркорлик фаолиятини амалга оширишлари учун шарт-шароитлар яратишга хизмат килади. Дастурга кўра жойларда фермерларга 1 нафардан банд бўлмаган ёшни бириктириб, унга бир гектар ер ажратиш орқали иш билан таъминлаш бўйича янги механизм жорий этилиши ишсиз ёшларимизни бандлигини тўлиқ таъминлаш кафолатини беради.


Нилуфар Джаббарова Хоразм вилоят Кенгаши Матбуот котиби2018-07-05 10:25:07

Давлатимиз раҳбари ўзининг ҳар бир чиқишларида ёшларни қўллаб-қувватлаш, ёшларга барча йўналишларда кенг имкониятлар яратиш, иш билан бандлик, ёшлар саломатлигини таъминлаш, келажагини яхшилаш, ёш оилаларга амалий кўмак бериш, ёш тадбиркорлар сафини кенгайтиришга доир мунтазам амалий кўрсатмалар бериб келмоқдалар. Ушбу саъй-ҳаракатлар замирида эса Ўзбекистонимизнинг келажагини ўз елкасига оладиган, эртанги кунимизнинг равнақини таъминлайдиган ёш ўғил-қизларни шунга муносиб қилиб тарбиялаш, ёшларнинг дунёқараши юксак, билимли, ташаббускор ва меҳнаткаш бўлиб етишишлари, она ватанга муҳаббат руҳида тарбияланиш мақсадиди туради. Ўйлайманки, Президентимизнинг биз, ёшлар учун жон куйдириб қайғуришларига ҳар бир тенгдошимиз ўзининг ҳайрли ишлари билан билдирилган ишончни албатта оқлайди.


Рахимова Мушарраф-O’zLiDeP Хоразм вилоят Кенгаши Аёллар билан ишлаш бўлими мудири2018-07-05 10:24:20

Давлатимиз томонидан бугунги кунда ёшларимизга қулай имкониятлар ва бир қатор имтиёзлар яратиб берилмоқда. Жумладан, ёшлар иттифоқи ҳузурида “Ёшлар – келажагимиз” жамғармаси ва унинг туман (шаҳар) филиаллари ташкил этилиб, мазкур жамғармага 770 миллиард сўм ажратилаётгани, жамғарма маблағларидан ёшларнинг бизнес лойиҳалари учун йиллик 7 фоиз ставка билан имтиёзли кредитлар берилиши бу билан уюшмаган ёшларни иш билан таъминланиши, буларнинг барчаси Юртбошимизнинг ёшларга қаратаётган эътибор ва ғамхўрлигидан дарак беради. Зеро, ёшларимизга эътибор - келажакка эътибор демакдир.


М.Хайитбоев. Шовот туман Кенгаши раисининг Ёшлар масалалари бўйича ўринбосари.2018-07-05 09:55:36

Ёшларга эътибор келажакка эътибор, Мухтарам президентимизнинг Ёшларга билдираётган ишончи, уларга берилаётган имкониятлардан оқилона фойдаланган холда юрт равнақига ўз хиссамизни қўшайлик.


Бобожонова Р. Шовот туман Кенгаши ижрочи котиби2018-07-05 09:53:17

Президентимизнинг ҳар бир сохада амалга ошираётган одилона ислохотларининг самарасини ёшларнинг бизнес ташаббуслари, стартаплари, ғоялари ва лойиҳаларини рўёбга чиқаришга кўмаклашиш ва қўллаб-қувватлаш, уларнинг ижтимоий-иқтисодий фаоллигини оширишга қаратилган “Ёшлар – келажагимиз” Давлат дастури қабул қилинганлигидан кўришимиз мумкин.


Рахманова Гульнара КР Тахтакупир тумани 2018-07-05 08:37:33

Хурматли Президентимиз тамонидан 4 июль куни утказилган видеоселекторда энг жолзарб ешларга ойд масалалар мукохама килинди.Йиғилишда ёшларни маънавий баркамол этиб тарбиялаш, уларни турли зарарли оқимлар ва ёт ғоялар таъсиридан асраш масаласига катта эътибор қаратди. Ешлар куни белгиланишинг узи ешларга эътибор ва куллаб кувватлаш уларга кенг имкониятлар яратилганидан дарак.Барча жойлардаги ешлар иттифоки фаоллари “Ёшлар – келажагимиз” Давлат дастурига амал килади ва фаоллик билан ендашади дея ишонч билдирамиз .


Носирова Шоира Кармана туман Кенгаши депутати2018-07-05 08:37:30

Ёшларни маънавий баркамол этиб тарбиялаш, уларни турли зарарли оқимлар ва ёт ғоялар таъсиридан асраш масаласига ҳар биримиз маъсулмиз.Ўсиб келаётган ёшларимизга эътиборни кучайтириш албатта оиладан бошланса, ота-оналаримиз ҳам Президентимиз каби ўз фарзандига қайғурса келажагимизга ишонч билан қараган бўлар эдик. Маҳаллаларда ёшлар билан ишлаш бўйича раис ўринбосари лавазимлари бор, шуларни жамоатчилик асосида эмас, маблағ билан таъминланса мақсадга мувофиқ бўлар эди.


Фикрингизни қолдиринг

Расмдаги мисолнинг жавобини киритинг, агар расмдаги сонлар кўринмаса "Ctrl+F5" тугмасини босинг. ЭСЛАТМА! ЖЎНАТИШ ТУГМАСИНИ БОСГАНИНГИЗДАН СЎНГ БИЛДИРГАН ФИКРИНГИЗ ШУ ЗАҲОТИ КЎРИНИШИ УЧУН САҲИФАНИ ҚАЙТА ЯНГИЛАНГ (ОБНОВИТЬ).

+