Тадбиркорлар ва ишбилармонлар ҳаракати – Ўзбекистон Либерал-демократик партияси ва унинг Олий Мажлис Қонунчилик палатасидаги фракцияси бутун халқимизни Ўзбекистон Республикаси Қуролли Кучлари ташкил этилганининг 29 йиллиги ва Ватан ҳимоячилари куни билан самимий муборакбод этади.

Кейинги йилларда Президентимиз, Қуролли Кучлар Олий бош қўмондони Шавкат Мирзиёев раҳбарлигида миллий армиямизнинг жанговар салоҳиятини юксалтириш, унинг моддий-техник базасини мустаҳкамлаш, замонавий қурол-яроғ ва аслаҳалар билан таъминлаш, ҳарбий хизматчиларнинг жисмоний, маънавий-интеллектуал тайёргарлигини ошириш, ижтимоий ҳимоясини кучайтиришга алоҳида эътибор қаратилмоқда. Бунинг самараси ўлароқ, миллий армиямиз сафларида хизмат қилиш, юртимиз тинчлиги ва осойишталигини таъминлаш ёшларимиз учун шарафли вазифага айланди.

Биз давлатимиз мудофаа қудратини ҳар томонлама ошириш, етук ва малакали ҳарбий кадрларни тайёрлашга, Ватан ҳимоячилари, уларнинг оилалари учун муносиб ҳаёт шароитларини яратишга бундан кейин ҳам алоҳида эътибор қаратиш тарафдоримиз.

Азиз Ватан ҳимоячилари!

Сизларни O‘zLiDePнинг кўп минг сонли аъзолари номидан мамлакатимизда кенг нишонлаётган шарафли айём – Ватан ҳимоячилари куни билан қутлар эканмиз, сиҳат-саломатлик, оилавий бахт, шарафли ва халқимизнинг хавфсизлиги, тинчлиги ва осойишталиги йўлида олиб бораётган масъулиятли фаолиятингизда улкан ютуқлар тилаймиз!

Актам Хаитов,

O‘zLiDeP Сиёсий Кенгаши

Ижроия қўмитаси раиси,

Олий Мажлис Қонунчилик

палатаси спикери ўринбосари