Бундан салкам бир йил аввал давлатимиз раҳбари вилоятимизда бўлганларида, Когон туманида маиший чиқиндиларни қайта ишлашга ихтисослаштирилган замонавий кластер барпо этиш лойиҳаси билан танишиб,  лойиҳани қисқа вақт ичида амалга ошириш бўйича топшириқ берган эдилар.  

Ана шу топшириқни бажариш учун дастлаб “ноль” қийматда олган биномизни қайта таъмирлаб, бир кеча-кундузда 450 тонна чиқиндини қабул қилиш қувватига эга бўлган технологияни олиб келдик. Кейин эса резина ва яроқсиз шиналардан муқобил ёқилғи, шох-шабба, хазон ҳамда ёғоч чиқиндиларидан брикит кўмир, қурилиш чиқиндиларидан иморатбоп блоклар каби жами ўндан зиёд турдаги маҳсулотларни тайёрлаш учун технология харид қилдик. Ҳозирда корхонамизда 400 нафардан зиёд ишчи-ходим меҳнат қиляпти. Келгусида ҳам режаларимиз кўп. Хусусан, корхона фаолиятини кенгайтирган ҳолда вилоятимизнинг барча туманларидаги чиқиндиларни қайта ишлашни мақсад қилганмиз.

Президентимизнинг корхонамизга ташриф буюриб, фаолиятимизни кенгайтириш бўйича берган тавсиялари корхонамиз жамоаси кучига куч, ғайратига ғайрат қўшди.  Айниқса, у кишининг чиқинди қайта ишланса, тайёр маҳсулотлар ишлаб чиқарилади, кўплаб иш ўринлари яратилади, энг муҳими, экологиямиз тоза бўлади, кейинчалик сув ва ҳаво орқали аҳоли саломатлигига етказилиши мумкин бўлган зарарнинг олди олинади, деган фикрлари бизни ўз устимизда кўпроқ ишлаб, қўшимча янги иш ўринлари яратишга ундамоқда. Давлатимиз раҳбарининг бу каби корхоналарни ташкил этишни ривожлантириш бўйича берган кўрсатмалари мамлакатимизда атроф-муҳит мусаффолигини таъминлаш ва янги иш ўринларини яратишда муҳим омилдир.

 Насриддин РАШИДОВ,

Когон туманидаги “Аҳолитранс”

МЧЖ  раиси, O’zLiDeP фаоли

***

Президентимиз Бухоро вилоятига ташрифи чоғида вилоят марказининг тарихий қисмида туризмни янада ривожлантиришга ўз таклиф-тавсияларини бердилар. Юртбошимизнинг туризмни ривожлантириш борасида айтган бу фикрлари сайёҳларнинг бетакрор тарихий ёдгорликлари, миллий ҳунармандчилик анъаналари билан дунёга машҳур бўлган Бухорои шарифга бўлган қизиқишини янада ошириши шубҳасиз.

Таъкидлаш керак, вилоятда 2018 йилда туризмни янада ривожлантириш концепциясига мувофиқ, 61 лойиҳани ҳаётга татбиқ этиш кўзда тутилган. Жумладан, 32 меҳмонхона, 12 мотел, 10 истироҳат боғи барпо этилиб, “Бухоро Палас”, “Варахша” ва “Зарафшон” меҳмонхоналари реконструкция қилинади. Бундан ташқари, туризм бўйича халқаро ва миллий ташкилотлар билан ҳамкорликни кенгайтириш, ресторанлар қуриш, сайёҳларга хизмат кўрсатувчи транспорт воситалари харид қилиш, маданий мерос объектларини тадбиркорларга ижарага бериш, ҳаво шарида саёҳатни ташкил қилиш, Ғиждувон, Шофиркон, Вобкент ва Жондор туманларида қишлоқ туризмини йўлга қўйиш режалаштирилган. Бу масканларда сайёҳлар ва меҳмонларга кўрсатиладиган хизмат сифатини яхшилаш ва бошқа бир қатор жиҳатлар бўйича маҳаллий вакиллик органларидаги O’zLiDeP депутатлик гуруҳлари депутатлик назоратига олинади.

Вилоят марказида тарихий ва маданий мерос объектларини тадбиркорларга ижарага бериш,  Бухоро бўйлаб ҳаво шарида саёҳатларни ташкил қилиш, Ғиждувон, Шофиркон, Вобкент ва Жондор туманларида қишлоқ туризмини йўлга қўйиш режалаштирилганлиги ҳам электоратимиз вакиллари – тадбиркорларга кенг имкониятлар эшигини очиши шубҳасиз. Бу борадаги устувор лойиҳалар ижроси вилоятга хорижий ва маҳаллий сайёҳлар оқимини сезиларли даражада кўпайтиради ҳамда тармоқда хизматлар экспорти ҳажмини оширади.

Шу ўринда Президентимизнинг Бухоро вилоятига ўтган йилги ташрифи чоғида вилоят марказининг сайёҳлик инфратузилмасини янада ривожлантириш мақсадида берилган топшириқлар босқичма-босқич бажарилаётганини таъкидлаш керак. Шаҳарнинг тарихий қисмида ҳунармандлар мавзесини қуриш, Ҳақиқат ва Хўжануробод кўчаларини кенгайтириб, сайлгоҳга айлантириш, Пойикалон ва Мирараб мадрасаларини қайта таъмирлаш бўйича берилган топшириқлар шулар жумласидандир.

Бир сўз билан айтганда, Президентимизнинг вилоятимизда ташрифи давомида айтган фикр-мулоҳазалари халқимиз турмуш фаровонлигини ошириш, эл-юрт маъмурчилигига эришиш, қўҳна ва ҳамиша навқирон Бухорои Шарифнинг обрў-эътиборини янада юксалтиришга хизмат қилади.  

Фармон АМИНОВ,

O’zLiDeP Бухоро вилоят Кенгаши раиси, 

                                                              Халқ депутатлари вилоят Кенгаши депутати

O‘zLiDePнинг Facebook’даги расмий саҳифаси ва Telegram’даги каналига аъзо бўлиб, сўнгги янгиликлардан хабардор бўлинг!