Shu yilning 7 oktabr kuni O’zLiDeP Siyosiy Kengashining navbatdan tashqari majlisi bo‘lib o‘tdi. Unda Tadbirkorlar va ishbilarmonlar harakati – O‘zbekiston Liberal-demokratik partiyasining Oliy Majlis Qonunchilik palatasi, xalq deputatlari viloyat, tuman va shahar kengashlariga bo‘lib o‘tadigan saylovda munosib ishtirok etishini ta’minlash borasidagi ustuvor vazifalar muhokama qilindi
 

Ma’lumki, Markaziy saylov komissiyasi mamlakatimizda 15 sentyabrdan saylov kampaniyasi boshlanganligini e’lon qildi. O’zLiDeP Siyosiy Kengashi Ijroiya qo‘mitasining shu munosabat bilan o‘tkazilgan yig‘ilishida partiyaning mazkur saylovda ishtirok etishi to‘Qrisida qaror qabul qilingan edi. 

Alohida ta’kidlanganidek, saylov fuqarolarning davlat hokimiyati organlari boshqaruvida o‘z vakillari orqali ishtirok etishdek Konstitutsiyaviy huquqidan foydalanishidir. Muhim siyosiy ahamiyatga ega bo‘lgan ana shu mas’uliyatli davr – saylov kampaniyasida munosib ishtirok etish O`zLiDePning asosiy maqsadi hisoblanadi. 

— Parlament quyi palatasi va xalq deputatlari mahalliy kengashlariga bo‘lib o‘tadigan saylov avvalgi saylovlardan tubdan farq qiladi, — dedi O`zLiDeP Siyosiy Kengashi Ijroiya qo‘mitasi raisi Codiqjon Turdiev. — Chunki bugungi saylovchining siyosiy darajasi, ongu tafakkuri yuksaldi. Ayniqsa, yoshlarimizning dunyoqarashi kengayib, xalqimizning ertangi kunga ishonchi, islohotlarga daxldorlik hissi kuchaydi. Saylov esa ana shu o‘zgarishlar natijasini amalda ko‘rsatuvchi siyosiy tadbirdir. Shuning uchun ham dunyo hamjamiyati mazkur jarayonni katta qiziqish bilan kuzatib bormoqda. 

Darhaqiqat, partiya Siyosiy Kengashining yaqinda bo‘lib o‘tgan VIII majlisida O`zLiDePning yangi Saylovoldi platformasi loyihasini tayyorlash jarayoni qizg‘in davom etayotgani alohida ta’kidlangandi. Endigi asosiy vazifa partiya s’ezdigacha bo‘lgan davrda mazkur dastur loyihasini hududlarda aholi keng qatlamlari o‘rtasida muhokamadan o‘tkazishdir. Ayniqsa, tadbirkor va fermerlar orasida shunday muhokamalarni tashkil etishga jiddiy e’tibor qaratish zarur. Toki har bir mulkdor shu dasturda o‘zini o‘ylantiradigan masalalarning yechimini topish bo‘yicha o‘z fikrlarini bildirish imkoniyatiga ega bo‘lsin. Haqiqatan ham aholi qatlamlarini qiziqtirgan, elektorat ko‘nglida bo‘lgan intilishlarga javoblarni o‘zida mujassam etgan Saylovoldi platformasi bilangina saylovchilarning ishonchini qozonish mumkin.

Siyosiy Kengash majlisida muhokama etilgan masalalar ko‘lami siyosiy jarayon arafasida partiyamizning oldida naqadar katta ishlar turganligini ko‘rsatadi. Bu esa, o‘z navbatida, faollarimizdan o‘z faoliyatini yanada kuchaytirish, yangi talablar darajasida ishlashni talab qiladi. Zero, tadbirkorlik «qozon»ida qaynagan, ishbilarmonlik sir-asrorlarini yaxshi biladigan, bu boradagi ilg‘or xorijiy tajribalarni chuqur o‘rgangan kishilarning partiya tomonidan mafkuraviy yo‘nalishda olib boriladigan ishlarga yetakchilik qilishi, tashabbuskorlikni namoyon etishini bugungi davrning o‘zi taqozo etmoqda. 

Majlisda tashkiliy masala ko‘rib chiqildi. Partiyaning Uchtepa tuman kengashi raisi vazifasida ishlab kelgan Dilshod Shoumarov O`zLiDeP Siyosiy Kengashi Ijroiya qo‘mitasi raisining mafkuraviy masalalar bo‘yicha o‘rinbosari etib saylandi.

«XXI asr» ijtimoiy-siyosiy gazetasi 2014 yil 9 oktabr, 40 (568)