O‘zLiDeP Navoiy viloyati Kengashi Navoiy shahar Xotin-qizlar qo‘mitasi bilan hamkorlikda “Faol tadbirkorlik, innovatsion g‘oyalar va texnologiyalarni qo‘llab-quvvatlash yili” davlat dasturida belgilangan keng qamrovli ustuvor vazifalar ijrosini ta’minlash maqsadida “Bunyodkor ayollar” loyihasi doirasida amaliy muloqot tashkil etdi.

Tadbirkor xotin-qizlarning huquqiy, iqtisodiy va siyosiy savodxonligini oshirish, partiya qoshida tashkil etilgan “Tadbirkor ayollar muammolarini o‘rganish guruhi” faoliyatini yanada jonlantirishga qaratilgan  muloqotda viloyat ekspert guruhi a’zolariga tadbirkor xotin-qizlardan 12 ta muammo va takliflar kelib tushdi.

– Muloqot davomida soliq qonunchiligini takomillashtirish konsepsiyasiga bir nechta takliflar berish va tadbirkorlik faoliyatimga doir muammolarga yechim topish maqsadida kelgan edim, – deydi tadbirkor ayol Xolisxon Qudratova. – Tadbir davomida davlat Soliq boshqarmasi xodimlariga konsepsiyaga doir o‘z takliflarimni berdim va faoliyatimda uchrayotgan muammolar yuzasidan “Tadbirkor ayollar muammolarini o‘rganish ekspert guruhi” a’zolariga murojaat qildim. Tashkilotchilarga rahmat! Ularning tashabbuslari bilan muammoim ijobiy hal etildi.   

 Shuningdek, muloqot davomida “Faol tadbirkorlik, innovatsion g‘oyalar va texnologiyalarni qo‘llab-quvvatlash yili” Davlat dasturida belgilangan vazifalar tadbirkorlar tomonidan atroflicha o‘rganilib, galdagi vazifalar belgilab olindi.

– Bugungi zamon tadbirkorniki, – deydi  partiya viloyat Kengashi ayollar bilan ishlash bo‘limi mudiri N.Saimova. – Shu bois keyingi yillarda mamlakatimizda kichik biznes va xususiy tadbikorlikka bo‘lgan e’tibor ko‘lami yanada kengaydi. “Faol tadbirkorlik, innovatsion g‘oyalar va texnologiyalarni qo‘llab-quvvatlash yili” Davlat dasturi esa bu e’tiborning mantiqiy davomidir.

Muloqotda “Tadbirkor ayollar muammolarini o‘rganish guruhi” a’zolari tomonidan bu kabi tadbirlarni viloyatning boshqa tumanlarida ham o‘tkazishga kelishib olindi.

M.HAMROYEV,

O‘zLiDeP Navoiy viloyat

 Kengashi matbuot

 xizmati xodimi

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!