O‘zLiDeP Surxondaryo viloyat Kengashi tomonidan yaqindagina poytaxtimizda yakunlangan “Tinchlik jarayoni, xavfsizlik sohasida hamkorlik va mintaqaviy sheriklik” mavzusidagi xalqaro konferensiyasidan ko‘zlangan maqsad va vazifalarni yoshlar o‘rtasida keng targ‘ib qilishga bag‘ishlangan “O‘zbek - afg‘on munosabatlari: siyosiy taraqqiyotning yangi bosqichida” mavzuida ochiq muloqot tashkil etildi.

Tadbirda O‘zLiDeP Surxondaryo viloyat Kengashi apparat xodimlari, Oliy va o‘rta maxsus ta’lim vazirligi huzurida Afg‘oniston fuqorolarini o‘qitish ta’lim markazining talaba yoshlari, partiyamiz faollari hamda jurnalistlar ishtirok etdi.

O‘zaro amaliy muloqot ruhida bo‘lib o‘tgan tadbirda tinchlik bo‘yicha Toshkent konferensiyasi qo‘shni davlatda barqarorlikni ta’minlash uchun muhim qadam bo‘lgani e’tirof etildi. Konferensiyada Afg‘onistonda tinchlik o‘rnatish uchun “Tolibon” harakati vakillari ham faol ishtirok etishi taklifi berildi. Ana shu taklifning o‘ziyoq, Konferensiyaning mintaqamiz hayoti uchun g‘oyatda muhim ekanini isbotlaydi.

Konferensiyada “O‘zbekiston-Turkmaniston-Eron-Ummon” va “O‘zbekiston-Qirg‘iziston-Xitoy” kabi boshqa mintaqaviy loyihalarni samarali tashkil etish kabi masalalarning muhokama etilgani Afg‘oniston iqtisodiy taraqqiyoti uchun ham g‘oyat muhimdir.

– Prezidentimiz Afg‘onistondagi nizoning nihoyatda murakkabligi, unda turli kuchlar ishtirok etayotganini hisobga olgan holda, BMT Xavfsizlik Kengashining tegishli rezolyutsiyalariga amal qilish lozimligini ta’kidlab o‘tdi, – Oliy va o‘rta maxsus ta’lim vazirligi huzurida Afg‘oniston fuqorolarini o‘qitish ta’lim markazi direktori Oybek Ro‘ziyev. – Yurtboshimizning ushbu fikriga ko‘plab xalqaro ekspertlar e’tibor qaratdi. Chunki Prezidentimiz ta’kidlaganidek, Afg‘onistonni qo‘shni davlatlar bilan savdo-iqtisodiy, transport-kommunikatsiya va madaniy-gumanitar aloqalarga jalb qilish vaziyatni maqbullashtirish hamda mamlakatni tinch hayotga qaytarish jarayoniga salmoqli hissa bo‘ladi. Bu borada O‘zbekiston boshqalarga namuna ko‘rsatmoqda. Xususan, qo‘shni davlatga elektr energiya yetkazib berish, temir yo‘l qurish, yangi ish o‘rinlari yaratish va mamlakatning tranzit salohiyatini oshirishga yaqindan yordam berib kelinmoqda.  

Tadbir davomida partiya xodimlari va Afg‘oniston fuqorolarini o‘qitish ta’lim markazi talabalarining fikr-mulohazalari tinglandi.

Zebiniso  SAPAROVA,

O‘zLiDeP Surxondaryo viloyati Kengashi

yoshlar bilan ishlash bo‘limi mudiri

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!