O‘zLiDeP Toshkent shahar Kengashi O‘zbekiston Tadbirkorlik va fermerlikni qo‘llab-quvvatlash markazi bilan hamkorlikda “Tadbirkorlik sub’ektlarini milliy valyutada kreditlash tartibi” mavzusida tadbir tashkil etdi. Unda tadbirkorlik sub’ektlarini kreditlash tartibi, kredit olishda bank, mijoz va uning hamkori o‘rtasidagi munosabatlar, kredit turlari va bank kredit siyosati to‘g‘risida, garov ta’minotining turlari hamda garov hujjatlarini rasmiylashtirish tartiblari haqida ma’lumotlar berildi.

– Hozirda bankimizga murojaat qilgan tadbirkorlarga belgilangan hujjatlar asosida yillik 14 foizdan 20 foizgacha ustama to‘lash sharti bilan kreditlar ajratilmoqda, – deydi Respublika “Ipoteka” ATIB bank raisi boshqarish departamenti direktor o‘rinbosari Shahnoza Alimova. – Endilikda hom-ashyo va asbob-uskunalar sotib olish maqsadida murojaat qilgan tadbirkorlarga kredit olish muddatini qisqartirish, ya’ni belgilangan hujjatlar taqdim etilgan taqdirda bir kun ichida kredit berish imkoniyati yaratilyapti. Maqsadimiz ham tadbirkorlar uchun qulay shart-sharoitlar yaratishdir.

Yig‘ilishda shuningdek, “Mikrokreditbank”ATB o‘quv markazi direktori Ashur Qodirov ishtirokchilarga kredit olishda bank, mijoz va uning hamkori o‘rtasidagi munosabatlar hamda tijorat banklari tomonidan kreditni uchinchi shaxsga chiqarish majburiyati belgilangan normativ hujjatlar va bu borada xorij tajribasi haqida kengroq ma’lumotlar berib o‘tdi.

Yig‘ilish davomida tadbirkorlar va o‘z biznesini boshlash istagida yurgan ishtirokchilar tomonidan ko‘plab savollar o‘rtaga tashlandi.

M.O‘RINOV,

O‘zLiDeP Toshkent shahar

                                                                              Kengashi matbuot kotibi

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!