Prezidentimiz Shavkat Mirziyoyevning “Obod qishloq” dasturi to‘g‘risida”gi Farmoni hamda “Obod qishloq” dasturini 2018 yilda amalga oshirish bo‘yicha qo‘shimcha chora-tadbirlar to‘g‘risida”gi qarori olis qishloq va mahallalar qiyofasini zamonaviylashtirish, qishloq ahli turmush tarzini yanada yaxshilashga qaratilgan.

 Shu bois bu ezgu tashabbus yurtimizning barcha hududlarida keng quloch yoymoqda. Sharoiti o‘ta og‘ir qishloqlar tanlanib, namuna sifatida obod va fayzli maskanga aylantirilmoqda. E’tiborlisi, bunday xayrli ishlarda nafaqat davlat idoralari, balki jamoat tashkilotlari ham faol qatnashayapti.

Yaqinda O‘zLiDeP Qashqadaryo viloyat Kengashi xodimlari va “Yosh liberallar” klubi a’zolari, deputatlar va partiya faollari Dastur doirasida viloyatning chekka hududlaridan biri Chiroqchi tumanidagi Chiyal qishlog‘ida bo‘lib, hududni obodonlashtirish va ko‘kalamzorlashtirish ishlarida  faol ishtirok etishdi.

 – Davlatimiz rahbari tomonidan boshlab berilgan bu xayrli tashabbus viloyatning barcha tumanlarida jadallik bilan olib borilmoqda, – deydi  O‘zLiDeP Qashqadaryo viloyat Kengashi apparat rahbari O. Sherov. –  Shu bois bu gal Chiroqchi tuman Chiyal qishlog‘ida bo‘lib, 15 ga yaqin kam ta’minlangan oilalar, nogiron va keksalarning holidan xabar olib, ularga oziq-ovqat mahsulotlari va kerakli dori-darmon vositalarini tarqatdik. Shuningdek, tuman tibbiyot muassasalarining yetakchi shifokorlari tomonidan 70ga yaqin aholi chuqurlashtirilgan tibbiy ko‘rikdan o‘tkazildi. Kasalligi aniqlangan bemorlarga davolanish uchun yo‘llanmalar berildi.

Partiya huzuridagi “Yosh liberallar” klubi faollari qishloqdagi kam ta’minlangan, ijtimoiy yordamga muhtoj oilalarning uy-joylarini obodonlashtirish va ta’mirlash ishlariga ko‘maklashdilar.

O‘zLiDeP  Qashqadaryo viloyat

Kengashi matbuot xizmati

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!