O‘zLiDeP Farg‘ona viloyat Kengashi viloyat hokimligi bilan hamkorlikda “Turon eko sement” MChJda “Sen ham faol yoshlar safidasan!” loyihasi doirasida “Yoshlar bandligini ta’minlash eng muhim vazifamiz” shiori ostida yoshlar Forumini tashkil etdi.

Forumda O‘zLiDeP Siyosiy Kengashi Ijroiya qo‘mitasi mas’ul xodimlari, “Yoshlar qanoti” faollari, tuman hokimligi, mahalliy vakillik organlaridagi partiya deputatlik guruhi a’zolari, uyushmagan yoshlar hamda OAV vakillari ishtirok etdi.

Tadbirda ta’kidlanganidek, O‘zLiDeP yoshlarning ezgu intilishlari va tashabbuslarini, ijodiy va intellektual salohiyatini ro‘yobga chiqarishga salmoqli hissa qo‘shmoqda. Bu borada olib borilayotgan ishlar partiyaning yoshlarning tadbirkorlikka oid bilim va ko‘nikmalarini shakllantirish, ularning biznes-rejalarini amalga oshirish, kasb-hunar kollej bitiruvchilari bandligini ta’minlashga ko‘maklashishdek dasturiy maqsadlariga hamohangdir.

Ushbu forum ham mazkur yo‘nalishdagi ishlarning mantiqiy davomi bo‘ldi. Chunki ushbu loyiha uyushmagan yoshlar muammolarini aniqlash va yechim topish, xorijda noqonuniy tarzda ishlab yurgan yoshlarni qaytarish, ularni turli diniy oqimlarga qo‘shilib ketishini oldini olish, yigit-qizlarni ish bilan ta’minlash maqsadida tashkil etildi.

–Partiyamiz Harakatlar strategiyasi hamda “Faol tadbirkorlik, innovatsion g‘oyalar va texnologiyalarni qo‘llab-quvvatlash yili” Davlat dasturida belgilangan vazifalarni samarali amalga oshirishga qattiq bel bog‘lagan, – deydi O‘zLiDeP Siyosiy Kengashi Ijroiya qo‘mitasi yoshlar bilan ishlash bo‘limi mudiri Sardor Maripov. – Shu bois yoshlarning ijtimoiy-siyosiy faolligini oshirish, huquqiy madaniyatini yuksaltirish, uyushmagan yoshlar bandligini ta’minlashga alohida e’tibor qaratyapmiz. Bugungi forum doirasida ham yoshlarning turmush sharoiti, orzu intilishlari bilan qiziqdik, muammolari tingladik, Aksariyat masalalar shu joyning o‘zida hal etildi.

Ta’kidlash kerak, forum doirasida bo‘sh ish o‘rinlari yarmarkasi bo‘lib o‘tdi. Partiya “Yoshlar qanoti” tashabbusi bilan ishsiz yurgan 100 nafar yigit-qiz “Turon eko sement” ma’suliyati cheklangan jamiyatiga ishga qabul qilindi.

Forum yakunida 30 nafar yoshga partiyaning a’zolik guvohnomalari topshirildi.

O‘zLiDeP Farg‘ona viloyat

Kengashi matbuot xizmati

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!