Xalq deputatlari Samarqand viloyat Kengashidagi O‘zLiDeP deputatlik guruhining navbatdagi yig‘ilishi bo‘lib o‘tdi. Yig‘ilishda Prezidentining 2018 yil 16 martdagi “Samarqand viloyatida kichik sanoat zonalarini tashkil etish chora-tadbirlari to‘g‘risida”gi qarori ijrosi yuzasidan viloyat Investitsiya boshqarmasi boshlig‘i Jamshid Musayevning hisoboti eshitildi.

Hisobotda ta’kidlanganidek, davlatimiz rahbarining mazkur qaroriga muvofiq, viloyatda 14 ta kichik sanoat zonalari tashkil etilgan. Kichik sanoat zonalarini tashkil etilishida 49,9 gektar yer maydoni va 39,5 ming kv.m bino-inshoatlar joylashgan hudud tuman va shahar hokimliklari balansiga o‘tkazilgan. Shuningdek, joriy yilning birinchi choragi davomida viloyatda jami 295 ta xorijiy investitsiya ishtirokidagi korxonalar ro‘yxatga olingan.

–Bundan tashqari, shu yilda Samarqand viloyatini kompleks rivojlantirish Dasturi doirasida umumiy qiymati 387,9 mln. dollar miqdoridagi xorijiy investitsiyalar ishtirokidagi 65 ta loyihalar belgilangan bo‘lib, shundan 255 mln AQSh dollari to‘g‘ridan-to‘g‘ri xorijiy investitsiyalar hisobiga to‘g‘ri keladi, – deydi Jamshid Musayev. – Ushbu loyihalarni amalga oshirish natijasida 4281 ta yangi ish o‘rinlari yaratish rejalashtirilgan.

Yig‘ilishda shuningdek, Urgut EIZ hamda yangi tashkil etilgan 14 ta kichik sanoat zonasida mavjud avtotransport yo‘llari, elektr energiyasi tarmoqlari, gaz liniyalarining yo‘qligi, suv, kommunikatsiya sohasidagi kamchiliklar o‘rganilib, viloyat Kengashining navbatdagi sessiyasiga kiritilishi belgilab olindi.

Yig‘ilishda sohada mavjud kamchilik va muammolarni bartaraf etish maqsadida Xalq deputatlari Samarqand viloyat Kengashidagi O‘zLiDeP deputatlik guruhining qarori bilan ushbu masalani viloyat Kengashining navbatdagi sessiya kun tartibiga kiritish taklifi maqullandi.

Erkin PARDAYEV,

Xalq deputatlari viloyat Kengashidagi

O‘zLiDeP deputatlik guruhi ijrochi kotibi

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!