O‘zLiDeP Qo‘ng‘irot tuman Kengashi Xalq deputatlari tuman Kengashidagi partiya deputatlik guruhi bilan hamkorlikda 9-may Xotira va qadrlash kuni munosabati bilan hududdagi Ikkinchi jahon urushi qatnashchilari holidan  xabar olishdi.

Uchrashuv davomida otaxonlar urush yillarida boshidan kechirgan talofatlar, og‘ir musibatli kunlarni so‘zlab berdi. Bugungi tinchlikni qadriga yetish, vatanni ko‘z qorachig‘idek asrash kerakligini bot-bot ta’kidladilar.   

– Urush yillarida boshimizdan o‘tgan qiyinchiliklar ilohim hech kimning boshiga tushmasin, – deydi Ikkinchi jahon urushi qatnashchisi Kamol ota Yusupov. – Chunki frontlarda jon olib, jon berishimizga to‘g‘ri kelgan. Mana, o‘sha mashaqqatli yillar ortda qoldi. Shu kunlarga yetkazganiga shukr!.

–Keksayganingda farzandlaring, nevara-chevaralar ardog‘ida farovon hayot kechirishdan boshqa zavq bo‘lmasa kerak, – deydi Qudaybergen ota Xojametov. – Chunki urush yillarida ko‘p talofatlar ko‘rdik, boshimizdan ne-ne mashaqqiyatlarni kechirmadik deysiz. Shukrki, bugun dorilomon kunlarda baxtli hayot kechiryapmiz. Shunday bir paytda Prezidentimiz tomonidan bizga ko‘rsatilayotgan yuksak e’tibor kishini yanada ruxlantiradi.

Uchrashuvlar davomida O‘zLiDeP faollari Ikkinchi jahon urushi qatnashchilariga esdalik sovg‘alari ulashdilar.

    Asem SIRIMBETOVA,

O‘zLiDeP Qoraqalpog‘iston

Respublikasi Kengashi xodimi

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!