O‘zLiDeP Bektemir tuman Kengashi xalq deputatlari tuman kengashidagi partiya deputatlik guruhi bilan hamkorlikda 9 may – Xotira va qadrlash kuniga bag‘ishlab  “Xotira aziz – qadr muqaddas” mavzuida bayram tadbiri o‘tkazdi.

Tadbirda so‘z olganlar o‘tganlar ruhini shod etish, keksalarga g‘amxo‘rlik ko‘rsatish ezgu an’anaga aylangani, bu o‘z navbatida, yangi avlod tafakkurida ham tarixga hurmat bilan qarash tuyg‘usini shakllantirayotganini ta’kidladilar.

–Yoshi ulug‘ insonlar, ayniqsa, urush va mehnat faxriylarini eslash, ularning holidan xabar olish barchamiz uchun ezgu an’anaga aylangan, – deydi O‘zLiDeP Bektemir tuman Kengashi apparat rahbari Gavharoy To‘xtasinova. – Xotira va qadrlash kunini munosib nishonlashdan ko‘zlangan maqsad ham – Vatan himoyachilarini xotirlash, oramizdagi fidoyi insonlar va tinchlikning qadriga yetishdan iborat. Shu boisdan ular ko‘rsatgan jasoratni hech qachon unutmaymiz, ular  bizning doim yodimizda!

Tadbir davomida ikkinchi jahon urushi qatnashchilari, frontorti mehnat faxriylari urush yillarida o‘z xotiralarini yoshlarga so‘zlab berdi.   

– Shu kunlarga yetkazganingga shukr, – deydi ikkinchi jahon urushi qatnashchisi Abdullajon Ortiqboyev. – Hozir tinch-osoyishta diyorda bolalarim, nevaralarim ardog‘ida keksalik gashtini surmoqdaman. Shunday bir paytda Prezidentimiz tomonidan urush va mehnat faxriylariga ko‘rsatilayotgan yuksak e’tibordan ko‘nglimiz tog‘dek ko‘tarildi.

Tadbirda yoshlar tomonidan ijro etilgan vatanni, tinchlikni ulug‘lovchi kuy-qo‘shiqlar, ikkinchi jahon urushida ishtirok etgan yosh askarlarning jangda ko‘rsatgan matonatini aks ettiruvchi sahna ko‘rinishlari yig‘ilganlarga o‘zgacha zavq ulashdi.

O‘zLiDeP Toshkent shahar Kengashi

matbuot xizmati

O‘zLiDePning Facebook va Instagramdagi rasmiy sahifasi hamda Telegram’dagi kanaliga a’zo bo‘lib, so‘nggi yangiliklardan xabardor bo‘ling!